396.58
Փաշինյանը խորհրդարանական ընդդիմությանը հրավիրեց քննարկելու արտահերթ ընտրությունների անցկացման ժամկետը
1 րոպեի ընթերցում
ԵՐԵՎԱՆ, 20 ՀՈՒՆՎԱՐԻ, ԱՐՄԵՆՊՐԵՍ: ՀՀ վարչապետ Նիկոլ Փաշինյանը խորհրդարանական ընդդիմությանը հրավիրեց քննարկել արտահերթ խորհրդարանական ընտրությունների անցկացման ժամկետները: «Արմենպրես»-ի փոխանցմամբ՝ այս մասին Փաշինյանն ասաց Ազգային ժողովում կառավարության հետ հարցուպատասխանի ընթացքում, անդրադառնալով «Բարգավաճ Հայաստան» խմբակցության անդամ Իվետա Տոնոյանի այն դիտարկմանը, թե գործող իշխանությունը սպառել է իրեն:
«Շատ լավ, սպառել ենք մեզ, եկեք գնանք, խորհրդարանական ընտրություններ անենք, տեսնենք, թե ով է սպառել: Եկեք նստենք, իրար հետ որոշենք ժամկետները, որ հետո չասեք, որ իշխանությունն ինքը որոշեց ժամկետները: Արտահերթ ընտրություններ անցկացնելու մեկ ձև կա՝ վարչապետի հրաժարական, երկու անգամ չի ընտրվում վարչապետ, տեղի է ունենում արտահերթ խորհրդարանական ընտրություն: Եկեք պայմանավորվենք, թե ինչ ժամկետներում, որ հետո չասեք, թե իշխանությունը միայնակ որոշեց»,- ասաց Փաշինյանը:
Ավելի վաղ ՀՀ փոխվարչապետ Տիգրան Ավինյանը «Բարգավաճ Հայաստան» և «Լուսավոր Հայաստան» խմբակցություններին հրավիրել էր քննարկել արտահերթ խորհրդարանական ընտրությունների անցկացման վերաբերյալ հուշագիր ստորագրելու հարցը:
Բաժանորդագրվեք մեր ալիքին Telegram-ում