Անդրանիկ Քոչարյանի կարծիքով՝ գերիների մասին քննարկումները միայն վնասելու են վերադարձման գործընթացին
1 րոպեի ընթերցում
ԵՐԵՎԱՆ, 19 ՀՈՒՆՎԱՐԻ, ԱՐՄԵՆՊՐԵՍ: ՀՀ Ազգային ժողովի Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանի կարծիքով՝ Ադրբեջանում գտնվող գերիների մասին քննարկումները միայն վնասելու են նրանց վերադարձնելու գործընթացին: «Արմենպրես»-ի փոխանցմամբ՝ այս մասին Քոչարյանն ասաց խորհրդարանում իր ելույթում:
«Վերջին օրերի ընթացքում ես և իմ գործընկեր պատգամավորները հանդիպումներ ունեցան անհայտ կորածների հարազատների հետ, ներկայացրեցինք նրանց զավակներին հայտնաբերելու ուղղությամբ տարվող աշխատանքների հաջորդականությունը, ինչպես նաև լսեցինք նրանց կարծիքները կատարվածի վերաբերյալ: Տարբեր հարթակներում անդադար խոսվում է գերիների մասին, առանց գիտակցելու, որ այս հարցը շուտափույթ լուծում չունի և այդ քննարկումները միայն վնասելու են գործընթացին»,- ասաց Անդրանիկ Քոչարյանը:
Քոչարյանը նշեց, որ այսօր տարվում են անհայտ կորածներին և գերեվարվածներին հայտնաբերելուն ու վերադարձնելուն միտված մեծ ծավալով աշխատանքներ, որոնց ներգրավված են նաև նրանց հարազատները:
«Յուրաքանչյուրս մեր առավելագույնը պետք է անենք զոհվածների, գերի ընկածների ու անհետ կորածներին մեր աջակցությունը ցուցաբերելու համար»,- նշեց հանձնաժողովի նախագահը: