2 րոպեի ընթերցում
ԵՐԵՎԱՆ, 8 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ Արդարադատության նախարար Ռուստամ Բադասյանը գործող քրեական օրենսգրքում առկա մի շարք թերությունները վերացնելու անհրաժեշտություն է տեսնում: «Արմենպրես»-ի փոխանցմամբ՝ այս մասին Բադասյանն ասաց դեկտեմբերի 8-ին Ազգային ժողովում Հայաստանի Հանրապետության քրեական օրենսգրքի նախագծի առաջին ընթերցմամբ քննարկման ընթացքում:
«Նախագիծը նախատեսում է համակարգային նոր լուծումներ, որոնք միտված են հանցավոր արարքների դեմ պետության հակազդեցության արդյունավետության բարձրացմանը, ինչպես նաև քրեական օրենսգրքի և պետության քրեական քաղաքականության հիմքում ընկած սկզբունքային մոտեցումների ներդաշնակության ապահովմանը: Ներկայումս գործող քրեական օրենսգիրքն իր գործունեության ավելի քան 15 տարիների ընթացքում ենթարկվել է մի շարք փոփոխությունների, որոնք հանգեցրել են օրենսգրքում ներքին հակասությունների և բացերի առաջացմանը: Նախագծի ընդունման կարևորությունը հիմնավորվում է օրենսգրքում առկա տարաբնույթ թերությունների վերացմամբ»,- ասաց Բադասյանը:
Արդարադատության նախարարը նշեց, որ նախագծով առաջարկվում է կարգավորել մի շարք առանցքային հարցեր:
Օրենքի նախագիծը չի քննարկվել խորհրդարանի գլխադասային հանձնաժողովում, սակայն նախարարը նշեց, որ օրինագիծը լայնորեն քննարկվել է ԱԺ գործընկերների հետ: