2 րոպեի ընթերցում
ԵՐԵՎԱՆ, 23 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի մարմնամարզության հավաքականը կորոնավիրուսի թեստ հանձնելուց հետո կմասնակցի Կիևի միջազգային մրցաշարին:
«Արմենպրես»-ի հետ զրույցում այս մասին ասել է Հայաստանի հավաքականի գլխավոր մարզիչ Հակոբ Սերոբյանը: Վերջինիս խոսքով` մրցաշարին մասնակցության ցանկություն են հայտնել մի շարք ուժեղագույն հավաքականներ, և նույնիսկ Իսրայելի ընտրանին մրցաշարի մեկնարկից օրեր առաջ արդեն իսկ Ուկրաինայում է:
«Մրցաշարը միջազգային ֆեդերացիայի ծրագրում ընդգրկված է: Այն բավականին լուրջ կազմ է հավաքել: Մրցաշարին կմասնակցեն Վահագն Դավթյանը, Գագիկ Խաչատրյանը և Արթուր Դավթյանը: Մարզիկները հիմնա ոչ այնքան լավ մարզավիճակում են, քանի որ դրա կարիքն էլ չկա: Մենք մրցաշարին այնպես չենք մասնակցի, ինչպես, օրինակ, կմասնակցեինք Եվրոպայի կամ աշխարհի առաջնությանը»,- ասաց Սերոբյանը:
Մարզչի խոսքով` այլ մրցաշարերի հետ կապված դեռևս հստակություն չկա: Հնարավոր է, որ Եվրոպայի առաջնություն անցկացվի, սակայն այն Բաքվում է լինելու, և Հայաստանը չի մասնակցի մրցաշարին: «Մտադիր ենք գոնե այս տարվա մեջ ուսումնամարզական հավաք անցկացնել կամ Թբիլիսում, կամ Մինսկում»,- եզրափակեց մասնագետը:
Ուկրաինայի միջազգային մրցաշարին հավաքական թիմը կմեկնի սեպտեմբերի 25-ին: