2 րոպեի ընթերցում
ԵՐԵՎԱՆ, 8 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ Ազգային ժողովի պետական-իրավական հարցերի մշտական հանձնաժողովը հավանություն է տվել Կառավարության հեղինակած «Հանրային ծառայության մասին» օրենքում փոփոխություններ և լրացումներ կատարելու մասին» և դրան կից օրենքների նախագծերի փաթեթին: «Արմենպրես»-ի փոխանցմամբ՝ փաթեթը հանձնաժողովի նիստում ներկայացրել է Արդարադատության նախարար Ռուստամ Բադասյանը:
Նախարարը նշել է, որ նախագծերը հակակոռուպցիոն ոլորտում իրականացվող քայլերի շարունակությունն են, որով ակնկալվում է կատարելագործել հայտարարագրման ինստիտուտը, ինչը հնարավորություն կտա ապահովել հայտարարատու պաշտոնատար անձանց գործունեության թափանցիկությունը:
Նախագծով մասնավորապես առաջարկվում է վերանայել հայտարարատու պաշտոնատար անձանց ցանկը և հայտարարագրման պարտականություն նախատեսել նաև Երևան համայնքի աշխատակազմի քարտուղարի, ավագանու անդամների, համայնքների աշխատակազմերի քարտուղարների համար, 15 հազար և ավելի բնակչություն ունեցող համայնքների ավագանու համար: Առաջարկվում է նաև սահմանել պաշտոնատար անձի կողմից փաստացի տիրապետվող անշարժ գույքը, տրանսպորտային միջոցները, թանկարժեք գույքը հայտարարագրելու պահանջ: Առաջարկվում է ընդլայնել նաև գույքի հայտարարագրման ժամանակ ներկայացվող տեղեկատվության շրջանակը:
Արդարադատության նախարարը նշել է, որ առաջարկվում է ներդնել ծախսերի հայտարարագրման ինստիտուտ, սահմանել հայտարարագրման ենթակա ծախսերի տեսակները և ծախսերի վերաբերյալ ներկայացվող տեղեկատվության շրջանակը:
Նախագծով Կոռուպցիայի կանխարգելման հանձնաժողովն օժտվել է օպերատիվ-հետախուզական գործունեություն իրականացնող մարմիններին դիմելու և անհրաժեշտ տեղեկություններ ստանալու իրավասությամբ՝ հայտարարագրերի վերլուծության ընթացքում գույքի փաստացի տիրապետումը ստուգելու և քրեական ենթամշակույթին հարելու հնարավորության ուսումնասիրության նպատակով:
