2 րոպեի ընթերցում
ԵՐԵՎԱՆ, 3 ՍԵՊՏԵՄԲԵՐԻ, ԱՐՄԵՆՊՐԵՍ: Ինֆեկցիոն հիվանդությունների ազգային կենտրոնում սեպտեմեբերի 3-ին գործարկվել է թթվածնի նոր կայան:
«Արմենպրես»-ի մամուլի սրահում կայացած ասուլիսի ժամանակ այս մասին ասաց ՀՀ ԱՆ Ինֆեկցիոն հիվանդությունների ազգային կենտրոնի տնօրենի նորանշանակ պաշտոնակատար Հովհաննես Մադոյանը և հավելեց, որ բուժառուները թթվածինը մոտ ապագայում կստանան նոր կայանից:
«Ինֆեկցիոն հիվանդությունների ազգային կենտրոնում ընթանում են վերանորոգման աշխատանքներ: Այս պահին վերանորոգվում է 5-րդ բաժանմունքը, որը սպասարկում էր մեծահասակներին: Գրեթե ավարտված է 6-րդ բաժանմունքը, որն առաջ ծառայում էր զինվորականներին, այժմ ամբողջ հիվանդանոցը ծառայում է կորոնավիրուսով հիվանդ բուժառուներին»,- նշեց Մադոյանը:
Նրա խոսքով՝ կատարվում են նաև ընթացիկ աշխատանքներ, քանի որ նախկինում ոչ բոլոր բաժանմունքներն են նախատեսված եղել օդակաթիլային վարակների վերահսկումն ապահովելու համար:
«Նախատեսվում է այդ տարածքում կառուցել նաև նոր մասնաշենք՝ կլինի մոդեռնիզացված կառույց: Այն միմյանց կկապի «Ա» և «Բ» մասնաշենքերը: Առաջիկայում կսկսվի նաև լաբորատոր մասնաշենքի կառուցումը: Արդեն արվել են նախագծային աշխատանքները»,- ընդգծեց Ինֆեկցիոն հիվանդությունների ազգային կենտրոնի տնօրենի պաշտոնակատարը:
Մադոյանը հույս հայտնեց, որ 2021 թվականին կկարողանան սկսել այդ մասնաշենքերի կառուցման աշխատանքները:
Առողջապահական համակարգում բարեփոխումների շրջանակում՝ նախկին ՀՀ ԱՆ «Նորք» ԻԿՀ-ի և ՀՀ ԱՆ ՁԻԱՀ-ի կանխարգելման հանրապետական կենտրոնի միավորման արդունքում գործում է ՀՀ ԱՆ ինֆեկցիոն հիվանդությունների ազգային կենտրոնը։
Լիլիթ Դեմուրյան