«Լիդիան Արմենիա»-ի և Ամուլսարում ակցիայի մասնակիցների վագոն-տնակները կհանվեն. Ջերմուկի քաղաքապետ
1 րոպեի ընթերցում
ԵՐԵՎԱՆ, 6 ՕԳՈՍՏՈՍԻ, ԱՐՄԵՆՊՐԵՍ: Ջերմուկի քաղաքապետ Վարդան Հովհաննիսյանի կարծիքով՝ վաղը «Լիդիան Արմենիա» ընկերության և Ամուլսարի շահագործման դեմ հանդես եկողների վագոն-տնակները կհանվեն։ Այդ մասին Հովհաննիսյանը նշեց Ամուլսարում լրագրողների հետ զրույցում:
«Լուծումները քննարկվում են, կառավարությունը տեղյակ է։ Հիմա այստեղ տեղադրված վագոն-տնակի հարցի ուղղությամբ ենք նամակ գրել «Լիդիանին»։ Պայմանավորվել ենք երկու կողմերի հետ, որ 2 կողմից էլ պիտի վագոն-տնակները գնան, և միանշանակ, ճանապարհ չպետք է փակվի»,- «Արմենպրես»-ի փոխանցմամբ, ասաց Ջերմուկի քաղաքապետը՝ ավելացնելով, որ վագոն-տնակները կտեղափոխվեն ամենայն հավանականությամբ օգոստոսի 7-ին:
Քաղաքապետը նշեց, որ Ամուլսարի 3 հենակետում էլ այդ հարցը բարձրացվել է ու ներկայումս սպասում են «Լիդիան Արմենիա» ընկերության պատասխանին։
Քաղաքապետը վստահեցրեց, որ ակցիայի մասնակիցները ևս տեղյակ են վագոն- տնակներից հեռացման մասին:
Եռօրյա բողոքի ակցիաները Ամուլսարում շարունակվում են, քանի որ «Լիդիան Արմենիա» ընկերությունը հեռացրել էր հանքի շահագործման դեմ հանդես եկողների վագոն-տնակը: