2 րոպեի ընթերցում
ԵՐԵՎԱՆ, 22 ՀՈՒԼԻՍԻ, ԱՐՄԵՆՊՐԵՍ։ Դատավորների նկատմամբ քրեական հետապնդումը որևէ պարագայում վեթինգի շրջանակում չի իրականացվում։
Ինչպես տեղեկացնում է «Արմենպրես»-ը, լրագրողների հետ զրույցում այս մասին ասաց ՀՀ արդադատության նախարար Ռուստամ Բադասյանը` պատասխանելով հարցին, թե օրերս երկու դատավորների նկատմամբ քրեական հետապնդումը, արդյոք, իրականացվում էր վեթինգի գործընթացի՞ շրջանակում։
«Ոչ, սա քրեական հետապնդում է սկսվել դատավորների նկատմամբ։ Իհարկե, որևէ կապ չունի վեթինգի գործընթացի հետ։ Իհարկե, չի բացառում մեկը մյուսին, օրինակ՝ վեթինգի որոշ գործիքակազմի դեպքում կարող է հայտնաբերվել հանցագործության մասին վկայող հատկանիշ, և դա, բնականաբար, կարող է դառնալ քրեական հետապնդման հիմք։ Բայց քրեական հետապնդումը որևէ պարագայում վեթինգի շրջանակում չի տեղավորվում»,- ասաց Բադասյանը։
ԱԱԾ-ն Սնանկության դատարանի երկու դատավորների նկատմամբ քրեական գործ է հարուցել՝ հանցավոր ճանապարհով ստացված առանձնապես խոշոր չափերի գույքն օրինականացնելու՝ փողերի լվացման, ապօրինի հարստանալու և պաշտոնեական լիազորությունները չարաշահելու դեպքերով։ Գլխավոր դատախազը միջնորդել է ՀՀ բարձրագույն դատական խորհրդին՝ համաձայնություն տալ Սնանկության դատարանի երկու դատավորների նկատմամբ քրեական հետապնդում հարուցելու և ազատությունից զրկելու համար: Ներկայացված միջնորդությունները Բարձրագույն դատական խորհրդի նիստերում քննարկվել և բավարարվել են: