30 տոկոսով կբարձրանա 5 մանկատան աշխատողների աշխատավարձը

ԵՐԵՎԱՆ, 23 ԱՊՐԻԼԻ, ԱՐՄԵՆՊՐԵՍ: Կառավարությունը լուծարված «Վանաձորի մանկատուն» ՊՈԱԿ-ի համար նախատեսված 141 միլիոն 358 հազար դրամից 36 միլիոն 685 հազար դրամը վերաբաշխում է մնացած ՊՈԱԿ-ներին՝ աշխատավարձի բարձրացման նպատակով:

«Արմենպրես»-ի հաղորդմամբ, Աշխատանքի և սոցիալական հարցերի նախարար Զարուհի Բաթոյանը նշեց, որ այս փոփոխության անհրաժեշտությունը բխում է երեխաների պաշտպանության համակարգում իրականացվող բարեփոխումներից: «Մեր հիմնական ռազմավարությունն ուղղված է երեխաների՝ ընտանիքում ապրելու իրավունքն ապահովելուն: Բայց այսօր 623 երեխա դեռ խնամվում է շուրջօրյա հաստատություններում, որոնցից 457-ը՝ հատուկմասնագիտացված հաստատություններում: Ուստի մենք նաև ծառայությունների որակը բարձրացնելու նպատակով աշխատակիցների աշխատավարձերի հարցը պետք է հոգանք:

Մենք նախկինում հայտարարել էինք, որ բարձրացնելու ենք խնամքի տների, մասնավորապես, տուն­ինտերնատների, մանկատների աշխատտողների աշխատավարձը:

Հունվարի 1-ից արդեն բարձրացել է շուրջ 700 աշխատակցի աշխատավարձ տարեցների խնամքի հաստատություններում աշխատող, իսկ այս որոշմամբ մայիսի 1-ից բարձրացնում ենք թվով 5 մանկատների աշխատողների աշխատավարձը»,- ասաց Բաթոյանը՝ ավելացնելով, որ խնամքի հաստատություններում սպասարկման ոլորտում աշխատողների աշխավարձը նվազագույնի չափով է, բարձրացումը վերաբերելու է շուրջ 230 մարդու, որոնց միջին աշխատավարձը կբարձրանա 30 տոկոսով: Օրինակ՝ դայակի աշխտավարձը 68 հազարից մայիսի 1-ից հետո կդառնա 96 հազար: Տնօրենի աշխատավարձը նույնպես բարձրացնում ենք՝ 143 հազարից դարձնելով 231 հազար դրամ:

Ըստ նախագծի՝ ընդհանուր տիպի մանկատներում միջին աշխատավարձը կդառնա 130.9 հազար դրամ կամ 23.9 հազար դրամով ավելի, իսկ հատուկ տիպի մանկատներում, աշխատավարձի համեմատաբար բարձր լինելու հանգամանքով պայմանավորված՝ 174.1 հազար դրամ կամ 18 հազար դրամով ավելի: