2 րոպեի ընթերցում
ԵՐԵՎԱՆ, 18 ԱՊՐԻԼԻ, ԱՐՄԵՆՊՐԵՍ: Կորոնավիրուսային հիվանդության դեպքերի կրկնապատկման տեմպը այս պահին 17 օր է: «Արմենպրես»-ի փոխանցմամբ՝ այս մասին իր «Ֆեյսբուք»-ի իր էջում հայտնել է ՀՀ առողջապահության նախարար Արսեն Թորոսյանը:
« Եթե այս տեմպը պահպանվի, ապա մայիսի 4-ին մենք կունենանք 2500 դեպք, իսկ մայիսի 21-ին 5000 դեպք: Եվ մեր բոլորի խնդիրը մնում է նույնը` կոտրել տարածման տեմպը և հիվանդության տարածման օղակները: Դրա համար անհրաժեշտ է բացառել հիվանդության մարդուց մարդ փոխանցումը` ամենուր սոցիալական հեռավորություն պահելով, միմյանց հետ սերտ շփման վարքագծերը փոխելով դեպի հեռավար շփումը, ինչպես նաև ձեռքերը հաճախակի լվանալով ևախտահանելով ու հնարավորինս դեմքին չդիպչելով»,- գրել է Թորոսյանը:
Նախարարը նաև հատուկ նշել է , որ թեստավորման հզորությունների մեծացումը՝ օրական 1000 թեստի, շատ բարդ և բազմաբաղադրիչ գործընթաց է եղել և երբևէ Հայաստանում օրական այսքան մեծ թվով ՊՇՌ թեստեր չեն արվել:
Այս բարդ գործընթացը իր մեջ ներառում է 5 հիմնական բաղադրիչ` մասնագետներ, սարքավորումներ, կենսաանվտանգություն, լոգիստիկա, էլեկտրոնային համակարգ: Թորոսյանը նկատել է ՝ դրանցից յուրաքանչյուրի պատշաճ ապահովումը մեծ ջանքեր է պահանջել մասնագետներից: «Նման հզորությունները միշտ պետք են գալու մեր երկրին` հետագայում նմանօրինակ մարտահրավերներին դիմակայելու համար»,-եզրափակել է նա:
Թորոսյանն ապրիլի 9-ին հայտնել էր, որ դեպքերի կրկնապատկման ցիկլը մոտենում է 10 օրին: Եթե այս տեմպը պահպանվեր, ապա ապրիլի 19-ին կարձանագրվեր մոտ 1.800 դեպք, իսկ ապրիլի 29-ին` 3600 դեպք:
Հայաստանում կորոնավիրուսի հաստատված դեպքերի թիվը ապրիլի 18-ի ժամը 11։00-ի դրությամբ հասել է 1248-ի, բուժվածների թիվը՝ 523-ի։ Գրանցվել է մահվան 20 դեպք:Այս պահին փաստացի բուժում է ստանում 705 պացիենտ:
Աննա Գրիգորյան