Երևանի փոխքաղաքապետը կոչ է անում հետևել սուպերմարկետներում դրամարկղերի մոտ արված գծանշաններին

ԵՐԵՎԱՆ, 11 ԱՊՐԻԼԻ, ԱՐՄԵՆՊՐԵՍ։ Վարակի կանխարգելման գործողությունները համակարգող Երևանի օպերատիվ շտաբի ղեկավար, Երևանի փոխքաղաքապետ Սերգեյ Հարությունյանը կոչ է անում քաղաքացիներին հետևել սուպերմարկետներում դրամարկղերի մոտ արված գծանշաններին և պահպանել սոցիալական հեռավորություն։

«Արմենպրես»-ի հաղորդմամբ՝ Հարությունյանն այս մասին ասաց մամուլի ասուլիսին։

«Մեզնից յուրաքանչյուրը կարող է վարակի տարածումը կանխելու ուղղությամբ աշխատանք տանել։ Պահպանելով 1-2 մ սոցիալական հեռավորություն խանութներում, սուպերմարկետներում՝ ներդնել փորքիկ լումա այդ գործընթացում։ Մենք բազմաթիվ անգամ հորդորել ենք նաև մեր մասնավոր սեկտորի գործընկերներին՝ դրամարկղերի մոտ հերթերի կանոնակարգման ուղղությամբ վերահսկողություն սահմանել»,- նշեց Հարությունյանը։

Նրա խոսքով՝ իրենք պարբերաբար ստանում են ահազանգեր, որ այս կամ այն սուպերմարկետում կան մարդկանց մեծ հերթեր, ինչին քաղաքապետարանն անմիջապես արձագանքում է և կապ հաստատում սուպերմարկետների ղեկավարության հետ։

Ապրիլի 11-ին Հայաստանի Հանրապետությունում կորոնավիրուսի տարածումը կանխարգելող աշխատանքները համակարգող հանձնաժողովի նիստում առաջարկվել է ևս 30 օրով երկարաձգել արտակարգ դրության ռեժիմը, պահպանել տեղաշարժի, հանրային տրանսպորտի, միջմարզային շարժի գործող սահմանափակումները, որոնց ժամանակացույցի վերաբերյալ կլինեն պարետի համապատասխան որոշումներ:

Արտակարգ դրությունը գործում է Հայաստանի Հանրապետության ամբողջ տարածքում 2020 թվականի մարտի 16-ից, ժամը 18:30-ից սկսած մինչև 2020 թվականի ապրիլի 14-ը, ժամը 17:00-ն: Երկրում գործում է խիստ սահմանափակումների ռեժիմ:

Հայաստանում կորոնավիրուսի հաստատված դեպքերի ընդհանուր թիվը 977 է, արձանագրվել է մահվան 13 դեպք: Ապաքինվել է 173 մարդ: