2 րոպեի ընթերցում
ԵՐԵՎԱՆ, 10 ԱՊՐԻԼԻ, ԱՐՄԵՆՊՐԵՍ: Հայաստանում սոցիալական աջակցության ոլորտում նպաստի համակարգում 2019-ին գրանցված է եղել ավելի քան 105 հազար ընտանիք, նպաստ է ստացել նրանցից 86 հազար 700-ը:
«Արմենպրես»-ի հաղորդմամբ՝ այս մասին ասաց ՀՀ աշխատանքի և սոցիալական հարցերի նախարար Զարուհի Բաթոյանը` ԱԺ առողջապահության և սոցիալական հարցերի մշտական հանձնաժողովի նիստում ներկայացնելով կառավարության ծրագրի 2019 թվականի կատարման ընթացքի եւ արդյունքների մասին զեկույցը:
«Սոցիալական աջակցության ոլորտում փորձել ենք համակարգային լուծումներ բերել: 2020-ին օրենսդրական փոփոխություն տեղի ունեցավ, և գործընթացը շարունակվում է: Նպաստի համակարգում գրանցված է եղել ավելի քան 105 հազար ընտանիք, որոնցից 86 հազար 700 ընտանիք ստացել է նպաստ: Նպաստի միջին չափը կազմել է 31 հազար 350 դրամ: Մյուս դեպքերում եղել է միանվագ, եռամսյակային աջակցություն կամ հրատապ օգնություն»,-ասաց Բաթոյանը:
Նա նաև տեղեկացրեց, որ 2019-ին սոցիալական աջակցության ոլորտում գյուղատնտեսական աշխատանքով զբաղվելու հնարավորություն են ստեղծել 1001 ընտանիքի համար: Դա նշանակում է, որ նպաստի համակարգում ընդգրկված մարդիկ, բացի ֆինանսական աջակցությունից, ստացել են այս գործունեությամբ զբաղվելու և միևնույն ժամանակ նպաստի համակարգից դուրս չգալու հնարավորություն: Նախարարը նշեց, որ դա հայտնի է որպես աղքատության փուլային հաղթահարման ծրագիր: Ծրագիրը շարունակվում է:
Աննա Գրիգորյան