Հանրաքվեի նախապատրաստման և անցկացման աշխատանքները դադարեցվում են․ ԿԸՀ

ԵՐԵՎԱՆ, 17 ՄԱՐՏԻ, ԱՐՄԵՆՊՐԵՍ։ Հայաստանի Հանրապետության կենտրոնան ընտրական հանձնաժողովը հայտարարություն է տարածել՝ հայտնելով, որ սահմանադրական փոփոխությունների հանրաքվեի նախապատրաստման և անցկացման նպատակով իրականացվող բոլոր աշխատանքները դադարեցվեւմ են գործընթացի բոլոր մասնակիցների կողմից։ «Արմենպրես»-ը ներկայացնում է ՀՀ կենտրոնական ընտրական հանձնաժողովի հայտարարությունը․

«Հիմք ընդունելով Հայաստանի Հանրապետության կառավարության 16.03.2020թ. «Հայաստանի Հանրապետությունում արտակարգ դրություն հայտարարելու մասին» թիվ 298-Ն որոշումը և ղեկավարվելով Հայաստանի Հանրապետության Սահմանադրության 208-րդ հոդվածով և «Հանրաքվեի մասին» Հայաստանի Հանրապետության սահմանադրական օրենքի 6-րդ հոդվածի 1-ին մասով` Կենտրոնական ընտրական հանձնաժողովը տեղեկացնում է, որ Հայաստանի Հանրապետության Սահմանադրության փոփոխությունների հանրաքվեի նախապատրաստման և անցկացման նպատակով իրականացվող բոլոր աշխատանքները, գործընթացները և միջոցառումները դադարեցվում են գործընթացի բոլոր մասնակիցների կողմից»:

Հայաստանում Սահմանադրության փոփոխությունների հանրաքվեն նախատեսված էր ապրիլի 5-ին, սակայն կորոնավիրուսի տարածումը կանխարգելելու նպատակով ՀՀ կառավարությունը մարտի 16-ից մինչև ապրիլի 14-ը երկրում արտակարգ դրություն է հայտարարել։ Ազգային ժողովում պատգամավորներից մեկի հարցին ի պատասխան ՀՀ վարչապետը նշեց, որ հայտարարված արտակարգ դրության պայմաններում հանրաքվեն չի կարող կայանալ։«Հանրաքվեն տեղի կունենա արտակարգ դրության ավարտից հետո ոչ շուտ, քան 50 և ոչ ուշ, քան 65 օր հետո: Հանրաքվեի գործընթացը կսկսվի այն կետից, որտեղ, որ ավարտվել էր»,- ասել է ՀՀ վարչապետը։