Լարսում կուտակումներ են. ԷՆ-ն հորդորում է նվազեցնել բեռնափոխադրումներըՀՀ և Վրաստանի անցակետերով
1 րոպեի ընթերցում
ԵՐԵՎԱՆ, 15 ՄԱՐՏԻ, ԱՐՄԵՆՊՐԵՍ: Վերին Լարսի մաքսակետում եղանակային պայմանների պատճառով առաջացել են մեքենաների կուտակումներ, կուտակումներ են առաջանում նաև Հայաստանի և Վրաստանի սահմանային մաքսային անցակետերում: ՀՀ էկոնոմիկայի նախարարությունը արտահանողներին հորդորում է որոշ ժամանակով նվազեցնել բեռնափոխադրումները նշված ուղղությամբ: «Արմենպրես»-ի փոխանցմամբ՝ այս մասին տեղեկացնում է Էկոնոմիկայի նախարարի մամուլի խոսնակ Աննա Օհանյանը:
«Արտահանողներին տեղեկացնում ենք, որ Վերին Լարսի մաքսակետում եղանակային պայմանների պատճառով առաջացել են մեքենաների կուտակումներ: Այս խնդրով պայմանավորված՝ կուտակումներ են առաջանում նաև Հայաստանի և Վրաստանի սահմանային մաքսային անցակետերում:
Այդ կապակցությամբ դիմում ենք տնտեսվարողներին հնարավոր դեպքերում որոշ ժամանակով նվազեցնելու բեռնափոխադրումները նշված ուղղությամբ»,-նշել է Օհանյանը:
Նա նաև վստահեցել է, որ, մշտական օպերատիվ կապի մեջ լինելով գործընկերների հետ, անմիջապես հանդես կգան լրացուցիչ հայտարարությամբ, երբ եղանակային պայմանները թույլ տան վերադառնալ բնականոն բեռնափոխադրումներին: