ԶՈւ նվագախմբում ցանկանում են նոր կադրեր գտնել. հայտարարվում է դիրիժորների ընդունելություն

ԵՐԵՎԱՆ, 12 ՄԱՐՏԻ, ԱՐՄԵՆՊՐԵՍ: ՀՀ զինված ուժերի գլխավոր շտաբի ռազմանվագախմբային ծառայությունում ցանկանում են շարքերը նոր կադրերով համալրել. հայտարարվում է զինվորական դիրիժորների ընդունելություն:

«Արմենպրես»-ի հետ զրույցում՝ ՀՀ ԶՈւ ԳՇ ռազմանվագախմբային ծառայության պետ, գլխավոր զինվորական դիրիժոր, գնդապետ Արմեն Պողոսյանը պատմեց մասնագիտության ընտրության, զինվորական նվագախմբում աշխատելու և այնտեղ դիրիժորների ընդունելության մասին:

Սիրում եմ երաժշտությունը

Սովորել եմ Երևանի Չայկովսկու անվան երաժշտական դպրոցում, այնուհետև 1980-1984 թթ. Ռոմանոս Մելիքյանի անվան երաժշտական դպրոցում՝ կոնտրաբասի բաժնում: Սիրում էի երաժշտությունն ու բարձրագույն կրթությունս որոշեցի ստանալ հենց այդ մասնագիտությամբ: Ռոմանոս Մելիքյանի անվան երաժշտական դպրոցում սովորելուց հետո պատրաստվում էի ընդունվել Երևանի Կոմիտասի անվան պետական կոնսերվատորիա, սակայն դրանից 3 ամիս առաջ տեղեկացա զինվորական դիրիժորի մասնագիտության մասին: 1985 թվականին ընդունվեցի Մոսկվայի կոնսերվատորիայի դիրիժորների ֆակուլտետ, ստացա «Զինվորական նվագախմբերի և անսամբլների կազմակերպում և ղեկավարում» մասնագիտությունը և զինվորական դիրիժորի որակավորում: Մինչ Մոսկվա մեկնելս, մոտ 1 տարի Օպերայի և բալետի ազգային ակադեմիական թատրոնում աշխատել եմ որպես նվագախմբի արտիստ:

Ընտանիքի առաջին երաժիշտը

Ընտանիքում առաջին երաժիշտը ես եմ: Մայրս և հայրս մասնագիտությամբ ինժեներներ են, եղբայրս էլ մասնագիտությամբ էներգետիկ է, և հպարտ կարող եմ ասել, որ իր ոլորտում լավագույններից է: Ես էլ Մոսկվայում սովորելուց հետո, վերադարձա Հայաստան և 1992 թվականի հունվարից ծառայում եմ ՀՀ զինված ուժերում մինչև այսօր, արդեն գրեթե 30 տարի:

Զինվորական նվագախմբում աշխատելը պատվաբեր է

Դիրիժորի մասնագիտությունը շատ հետաքրքիր է ու պատվաբեր: Այստեղ կարելի է անծայրածիր գործունեություն ծավալել, միջազգային մրցույթների, փառատոնների մասնակցել: ԳՇ զինվորական նվագախումբը ստեղծվել է 1992 թվականի նոյեմբերից և այն ժամանակվանից մինչև այսօր կոչված է դիմավորման, ճանապարհման, ծաղկեպսակներ դնելու արարողության և պետական ու կառավարական միջոցառումների երաժշտական մասն ապահովելու համար:

Դիրիժորի որակավորում ստանալու համար ընդունելություն ենք հայտարարում

Մենք այժմ հայտարարել ենք ընդունելություն 2020-2021 թթ. ուսումնական տարվա Մոսկվայի ռազմական համալսարանի զինվորական դիրիժորների ռազմական ինստիտուտում 5-ամյա ուսուցման դասընթացներին մասնակցելու համար: Ավարտելով այդ դասընթացները՝ կուրսանտները ստանում են լեյտենանտ զինվորական կոչում և փողային նվագախմբի զինվորական դիրիժորի որակավորում: Դիրիժոր դառնալու համար պարտադիր է նախնական երաժշտական կրթությունը:

2004 թվականից մենք պայմանագիր էինք կնքել Երևանի Կոմիտասի անվան պետական կոնսերվատորիայի հետ, որի շրջանակում պետական պատվերով, տարեկան 5 դիրիժոր էինք պատրաստում: Այս ծրագիրը հնարավորություն տվեց մեզ բոլոր նվագախմբերը կադրերով լրացնել: 2019 թվականից որոշվեց, որ պետք է ուղարկել սովորելու ռազմաուսումնական հաստատություններ, որպեսզի ստանան լիակատար դիրիժորի ուսում և ավարտելուց հետո պայմանագիրը լինի 20 տարով:

Ռազմաուսումնական հաստատությունների ընդունելությանը կարող են մասնակցել նախազորակոչային տարիքի ՀՀ քաղաքացիները, ինչպես նաև պարտադիր կամ պայմանագրային զինվորական ծառայություն անցած կամ անցնող արական սեռի քաղաքացիները և զինծառայողները, ում տարիքը չի գերազանցում 23 տարեկանը: Տեղեկություններ ստանալու համար հայտարարությանը համապատասխանողները կարող են դիմել ՀՀ ԶՈւ ԳՇ ռազմանվագախմբային ծառայություն կամ զանգահարել ՀՀ ՊՆ թեժ գիծ՝ 1-28:

Հույս ունեմ, որ կկարողանանք գտնել այն կադրերին, որոնք ցանկություն ունեն սովորելու Մոսկվայում, այնուհետև աշխատելու ՀՀ ԶՈւ-ում: Մեր նվագախմբի 60 տոկոսը պայմանագրային, իսկ 40-ը՝ պարտադիր ժամկետային զինծառայողներ են:

Այս տարի ունենք հրավերներ տարբեր երկրներից

Մերգելյան ինստիտուտում այս տարի կայանալու է զենքի և զինամթերքի վերաբերյալ էքսպո, որտեղ մեր նվագախումբը պետք է հանդես գա: Այս տարի ունենք հրավերներ՝ Գերմանիայից և ԱՄՆ-ից, որոնց մասնակցության վերաբերյալ մեզ մոտ դեռևս որոշում չի կայացվել, քանի որ պետք է հստակեցվեն մեր պլանները, հաշվի առնվի նվագախմբի զբաղվածությունը և մի շարք այլ հարցեր: Ղազախստանից նույնպես ունենք հրավեր, որտեղ կմեկնի մեր երգչախումբը: Ռուսաստանի Դաշնության Մոսկվա և Դոնի Ռոստով քաղաքներում Հայրենական Մեծ պատերազմի հաղթանակի 75-ամյակին նվիրված տոնակատարությունների շրջանակում երկու զորախումբ է մեկնելու, որոնց կցված է նաև 2 նվագախումբ: Գրեթե ամեն օր պարապմունքներ են անցկացվում՝ հավուր պատշաճի ներկայանալու համար: Մոսկվայում տեղի է ունենալու նաև «Անմահ գունդ»-ի համերգը, որտեղ ելույթ կունենա նաև մեր երգչախումբը:

Զրուցեց՝ Լիլիթ Դեմուրյանը

Լուսանկարները՝ Հայկ Մանուկյանի