ԵՐԵՎԱՆ, 25 ՓԵՏՐՎԱՐԻ, ԱՐՄԵՆՊՐԵՍ: Երկրապահ կամավորականների միություն վարչությունն ու «Ֆիդայիներ» ՀԿ-ն Զորավար Անդրանիկ Օզանյանի ծննդյան 155-ամյակի օրն այցելեցին Եռաբլուր զինվորական պանթեոն:
«Արմենպրես»-ի հաղորդմամբ՝ ԵԿՄ վարչության նախագահ Սասուն Միքայելյանը լրագրողների հետ զրույցում ասաց, որ Զորավար Անդրանիկը մեծ դերակատարություն է ունեցել ֆիդայական շարժման ժամանակ:
«Զորավար Անդրանիկը դարասկզբին մեծ դերակատարում ունեցավ՝ շատ ու շատ մարդկանց փրկելով արհավիրքից: Դուք գիտեք՝ նա որտեղ գնում էր, երեխաներին հավաքում, բերում էր Հայաստան: Կարծում եմ, որ ԵԿՄ-ն ժառանգն է Զորավար Անդրանիկի և Սպարապետ Վազգեն Սարգսյանի: Դարավերջին գտնվեց մեկը՝ ի դեմս սպարապետ Վազգեն Սարգսյանի, որը կարողացավ համախմբել ջոկատները: Չունենալով կանոնավոր բանակ, նրանց շնորհիվ՝ ֆիդայական շարժման և ազատամարտիկների հետ, կարողացանք փրկել Արցախի մեր ժողովրդին և ազատագրել այդ տարածքները»,- նշեց Միքայելյանը:
Զորավարի զարմիկ Լևոն Օզանյանն ասաց, որ հպարտ է հայ և Անդրանիկ Օզանյանի հետնորդը լինելու համար:
«Շատ ուրախ եմ, որ Զորավարի ծննդյան օրն այսքան մարդ է գալիս Եռաբլուր: Համոզված եմ, որ մարդիկ սերնդեսերունդ կայցելեն նրա շիրիմին, կհիշեն և կհպարտանան նրանով»,- ընդգծեց Լևոն Օզանյանը:
«Ֆիդայիներ» հասարակական կազմակերպության նախագահ Սեյրան Չիլինգարյանը շեշտեց, որ սերունդներին կոչ արեց ապրել անդրանիկաբար, ապրել հայաբար:
«Հող են ազատագրել մեր տղաները, մի քիչ կիսատ ենք թողել, սերունդներին կոչ ենք անելու շարունակել մեր կիսատ թողած գործը: Մենք Գանձակում պիտի տոնենք այս տոնը, Մասիսի վրա, Ղարսում, Վանում, Մուշում, Սասունում…»,- ասաց Չիլինգարյանը:
Ներկաները ծաղիկներ և ծաղկեպսակներ խոնարհեցին զորավար Անդրանիկի, սպարապետ Վազգեն Սարգսյանի, Ապրիլյան քառօրյա պատերազմում զոհվածների շիրմաքարերին:
Պանթեոնից հետո «Ֆիդայիներ» ՀԿ անդամներն այցելեցին «Զորավար Անդրանիկ» ֆիդայական շարժման թանգարան, որտեղ տարբեր մարզիկներ հանդես եկան սպորտային ելույթներով:
Բարերար Արմեն Գեորգենն էլ «Զորավար Անդրանիկ» թանգարանին նվիրեց Ֆրանսիայում գտնված և Հայաստան բերված Զորավար Անդրանիկի դիմանկարը, որն արվել է մոտ 100 տարի առաջ: