Բաթոյանն ամփոփել է երեխաների ցերեկային ծառայությունների ընդլայնման աշխատանքների արդյունքները
3 րոպեի ընթերցում
ԵՐԵՎԱՆ, 31 ՀՈՒՆՎԱՐԻ, ԱՐՄԵՆՊՐԵՍ: ՀՀ աշխատանքի և սոցիալական հարցերի նախարար Զարուհի Բաթոյանը միջանկյալ ամփոփել է երեխաների ցերեկային և կանխարգելման ծառայությունների ընդլայնման աշխատանքների արդյունքները:
Ինչպես տեղեկացնում է «Արմենպրես»-ը, նախարարը «Ֆեյսբուք»-ի իր էջում գրել է.
«Եթե 2019-ի ընթացքում ՀՀ աշխատանքի և սոցիալական հարցերի նախարարության կողմից պատվիրակված ծառայությունների միջոցով անհրաժեշտ ծառայություններ են տրամադրվել շուրջ 530 երեխայի, ապա արդեն իսկ ամփոփված մրցույթների արդյունքներով շահառու երեխաների թիվը շուրջ 2 945 է կամ շուրջ 5 անգամ ավելի։
Էապես ընդլայնվել է նաև ծառայությունների աշխարհագրությունը։ Եթե 2019-ինպատվիրակված ծառայությունները տրամադրվել են միայն չորս մարզում, ապա ներկայումս ծառայությունները հասանելի են բոլոր մարզերի մեկից ավելի համայնքներում։
Փոխվել է նաև ծառայությունների բովանդակությունը. այժմ ծառայությունները ներառում են շարժական ծառայություններ, որոնք հնարավոր կդարձնեն ընդգրկել նաև շրջակա գյուղական համայնքների երեխաներին, ինչպես նաև սոցիալական օգնականի ծառայությունը, որի միջոցով երեխային աջակցություն կտրամադրվի իրեն անհրաժեշտ վայրում։ Սա հատկապես կարևոր է հաշմանդամություն ունեցող երեխաներին աջակցության համար, օրինակ՝ դպրոցում։
Էապես ընդլայնվել և փոփոխվել է երեխաների մուտքը հաստատություններ կանխարգելող ծրագիրը, որ նախկինում բեռնաթափում էր կոչվում։ Մասնավորապես, ծրագիրը նախկինում իրականացվել է շուրջ 110 շահառուների համար, ներկայումս շահառու երեխաների թիվը 560 է՝ շուրջ հինգ անգամ ավելի»:
Ծրագիրը նախկինում իրականացվել է միայն Լոռու և Շիրակի մարզերում: Ներկայումս շահառու ծրագիրն իրականացվում է բոլոր մարզերում և ներառում է նաև հաշմանդամություն ունեցող երեխաների մուտքը հաստատություններ կանխարգելելը՝ առողջապահության հաստատությունների, նորածնային բաժանմունքների աշխատակիցների հետ սերտ աշխատանքի ու վերապատրաստման բաղադրիչներով։
«Այս ամենն արվել է առանց պետական բյուջեի հավելյալ միջոցների տրամադրման՝ եղած միջոցների շրջանակներում»,- գրել է Բաթոյանը: