«Հայաստանի Հանրապետություն» օրաթերթ. Թուրքիան կարող է հայտնվել լարվածության նոր կիզակետում

ԵՐԵՎԱՆ, 9 ՀՈՒՆՎԱՐԻ, ԱՐՄԵՆՊՐԵՍ։ «Թուրքիան այսօր հայտարարում է, թե անհանգստացած է տարածաշրջանում ամերիկա-իրանական լարվածության սրմամբ: Անգամ նշել են, թե «Իրաքը հակամարտության գոտի վերածելը կվնասի ինչպես Իրաքի, այնպես էլ տարածաշրջանի խաղաղությանը եւ կայունությանը»: Ապա կոչ է արվում բոլոր շահագրգիռ կողմերին՝ առաջնահերթություն տալ դիվանագիտական կարգավորմանը:

Ինչպես ասում են, այս կոչը շատ զվարճալի կլիներ, եթե իրավիճակը վտանգավոր չլիներ: Անհանգստություն ցուցադրող Թուրքիան անվարան բացում է եւս մեկ հակամարտ ճակատ՝ իր զինուժը Լիբիա ուղարկելով: Իհարկե, էլի ձեւականորեն, Թուրքիայի նախագահը հեռախոսազրույց է ունեցել ԱՄՆ-ի նախագահի հետ, որի ժամանակ քննարկվել են տարածաշրջանային մի շարք հարցեր, մասնավորապես՝ Լիբիայում եւ Սիրիայում տեղի ունեցող իրադարձությունները: Այսինքն՝ Անկարան անգամ այս լարված պահին, երբ կարող է պատերազմ բռնկվել ԱՄՆ-ի եւ ԻԻՀ-ի միջեւ, քննարկում է իր ծավալապաշտական հնարավորությունները:

Այս տարվա հունվարի սկզբին Թուրքիայի խորհրդարանը հավանության է արժանացրել մի օրինագիծ, որով նախատեսվում է թուրք զինվորականներին ուղարկել Լիբիա (509 պատգամավորից 184-ը դեմ են քվեարկել, 325-ը՝ կողմ): Նշվել է, որ ավելի վաղ Լիբիան պաշտոնապես խնդրել էր Թուրքիային «օդային, ցամաքային ու ծովային աջակցություն տրամադրել, որպեսզի հետ մղեն արեւելյան ուժերի գրոհը մայրաքաղաք Տրիպոլիից»: Թուրքիայի նախագահն իր հերթին հայտարարել էր, որ ցանկանում է բանակ ուղարկել՝ Լիբիայի նախագահին աջակցելու համար, որը պայքարում է գեներալ Հաֆթար Խալիֆայի դեմ:

Այս ծավալումներին հավանություն չեն տվել Մոսկվան եւ Թեհրանը»:

Նյութն ամբողջությամբ կարդացեք թերթի այսօրվա համարում: