ՍՏԵՓԱՆԱԿԵՐՏ, 17 ՀՈւՆԻՍԻ, ԱՐՄԵՆՊՐԵՍ: Արցախի Հանրապետության նախագահ Բակո Սահակյանը Ստեփանակերտի մշակույթի եւ երիտասարդության պալատում այսօր մասնակցել է Բուժաշխատողի օրվա կապակցությամբ կազմակերպված միջոցառմանը:

Նախագահը պետական պարգեւներ է հանձնել ոլորտի մի խումբ աշխատողների ու վետերանների եւ հանդես եկել ելույթով:

Ինչպես «Արմենպրես»-ին տեղեկացրին Լեռնային Ղարաբաղի Հանրապետության նախագահի աշխատակազմի տեղեկատվության գլխավոր վարչությունից, իր խոսքում նախագահը կարեւորել է բուժաշխատողների ավանդը Արցախի ժողովրդի առողջության պահպանման եւ բնակչության բուժօգնության ապահովման գործում:

Երկրի ղեկավարն ընդգծել է, որ առողջ հասարակություն ունենալը պետության առջեւ ծառացած հիմնական խնդիրներից մեկն է, եւ այս ուղղությամբ արվում է հնարավորը քաղաքացիներին որակյալ բուժսպասարկում մատուցելու, հանրապետությունում նոր եւ ժամանակակից տեխնիկայով հագեցած հիվանդանոցներ եւ բժշկական հաստատություններ կառուցելու նպատակով:

Բժշկական աշխատողի օրվա կապակցությամբ Արցախի Հանրապետության նախագահ Բակո Սահակյանն այսօր ստորագրել է հրամանագիր' պարգեւատրելու մասին: Առողջապահության, բնակչության բուժօգնության եւ բուժսպասարկման բնագավառում ունեցած ձեռքբերումների համար պարգեւատրվել են' «Վաչագան Բարեպաշտ» մեդալով 'Կարինե Եղիշեի Աթայանը (Լեռնային Ղարաբաղի Հանրապետության առողջապահության նախարարության «Արմինե Փակումեանի անվան պոլիկլինիկա» փակ բաժնետիրական ընկերության սրտաբան, բժշկական գիտությունների թեկնածու), Կարեն Յուրիի Բազիյանը (Լեռնային Ղարաբաղի Հանրապետության առողջապահության նախարարության «Հանրապետական հիվանդանոց» փակ բաժնետիրական ընկերության գործադիր տնօրենի տեղակալ, վիրաբույժ), Կարեն Ալբերտի Բալասանովը (Լեռնային Ղարաբաղի Հանրապետության առողջապահության նախարարության «Մոր եւ մանկան առողջության պահպանման կենտրոն» փակ բաժնետիրական ընկեության բժիշկ), «Երախտագիտություն» մեդալով'

Անահիտ Ալեքսանդրի Ավանեսյանը (Լեռնային Ղարաբաղի Հանրապետության առողջապահության նախարարության «Մոր եւ մանկան առողջության պահպանման կենտրոն» փակ բաժնետիրական ընկերության բժիշկ, Իրինա Լազարի Գրիգորյանը (բժշկուհի (Մարտունու շրջան, գյուղ Սոս)), Զինա Ավանեսի Ղահրամանյանը

(Լեռնային Ղարաբաղի Հանրապետության առողջապահության նախարարության «Ստեփանակերտի Թամարա Քամալյանի անվան պետական բժշկական քոլեջ» պետական ոչ առեւտրային կազմակերպության դասատու): Արցախի ղեկավարի' նույն օրվա մեկ այլ հրամանագրով' առողջապահության զարգացման գործում ունեցած ավանդի, բացառիկ մասնագիտական կարողությունների դրսեւորման համար ԼՂՀ առողջապահության նախարարության «Հանրապետական հիվանդանոց» փակ բաժնետիրական ընկերության բժիշկ Վլադիմիր Մուսայելյանին շնորհվել է Լեռնային Ղարաբաղի Հանրապետության վաստակավոր բժշկի պատվավոր կոչում: