ԵՐԵՎԱՆ, 4 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ վարչապետ Նիկոլ Փաշինյանը կարծում է, որ նախարարի հրաժարականը չի կարող լինել քաղաքական զրո ազդեցություն ունեցող քաղաքական ուժի քմահաճույքի արդյունք: «Արմենպրես»-ի հաղորդմամբ` Փաշինյանը նման տեսակետ հայտնեց ԱԺ-ում կառավարության անդամների հետ հարց ու պատասխանի ժամանակ` պատասխանելով Իմ քայլը խմբակցության պատգամավոր Անուշ Բեղլոյանի հարցին:

Բեղլոյանը հիշեցրեց, որ ԿԳՄՍ նախարար Արայիկ Հարությունյանի հրաժարականը պահանջող ուսանողների ցույցերը շարունակվում են, նույնիսկ բերման ենթարկվածներ եղան, նա նշեց, որ ցուցարարները ցանկացել են հանդիպել նախարարին, սակայն այդ պահանջը մերժվել է: Պատգամավորը հետաքրքրվեց, թե վարչապետի կարծիքով որն է  հարցի հանգուցալուծումը:

«Ցուցարարների հետ հանդիպման ընթացքում ես այդ թեմային անդրադարձել եմ և ասել, որ կրթության ոլորտում որևէ անձ քաղաքականություն չի վարում: Քաղաքականությունը վարում է ՀՀ կառավարությունը: Եվ, ըստ էության, քննարկվող հարցերի շուրջ տվել եմ անհրաժեշտ պարզաբանումներ: Եվ ես կարծում եմ, որ մտքերի ընթացքը և ուղղությունը ճիշտ է, նաև հիմնավորել եմ, թե ինչու եմ դա ճիշտ համարում: Չի կարող որևէ նախարարի հրաժարական լինել քաղաքական զրո ազդեցություն ունեցող քաղաքական ուժի քմահաճույքի արդյունք: Ես ուզում եմ՝ մենք սա հստակ արձանագրենք»,-ասաց Փաշինյանը:

Վարչապետը նկատեց` պատգամավորը խոսեց ուսանողների մասին, սակայն ինքը կարծում է, որ խոսքը ոչ թե ուսանողների, այլ մի քաղաքական ուժի մասին է, որը երկար տարիներ ՀՀ-ում եղել է ապօրինի կոռումպացված իշխանության կարևոր հենասյուներից մեկը: «Եթե այդ քաղաքական ուժը չառերեսվի այդ իրականության հետ և գնահատական չտա իր իսկ վերնախավի մի հատվածի, ձեզ հայտնի ժամանակաշրջանի գործունեությանը, այդ քաղաքական ուժը ՀՀ-ում ուղղակի չունի ապագա, որքան էլ դա կարող է հնչել ցավալի: Եվ դա վերաբերվում է ոչ միայն այդ քաղաքական ուժին, այլ նաև այն բոլոր քաղաքական ուժերին, ովքեր այդ քաղաքական ուժի հետ մի մեծ կլոր սեղանի շուրջ նստած էին: Այսինքն` մենք ընդամենը լսում ենք հեռացող գնացքի անիվների տրոփյունը»,-ասաց վարչապետը:

Փաշինյանը շեշտեց` կրթությունը շատ նուրբ ոլորտ է: Նա հայտնեց, որ նախարարն արդեն ունի հանձնարարությունը, կառավարությունը պետք է ուշադիր լսի բոլոր փաստարկներն ու բոլոր քննադատությունները, ի գիտություն ընդունի, հղկի տեսակետները, ընդունի սխալները: «Սակայն նրանք, ովքեր փորձում են մեզ հետ խոսել քմահաճույքներով ու շանտաժներով, իմ ռեակցիան ուղիղ հակառակն է: Եվ ես ուզում բոլոր նրանց, ովքեր փորձելու են մեզ հետ շանտաժով խոսել, ասել` դա լինելու է մենախոսություն»,-եզրափակեց վարչապետը:

ՀՅԴ ՀԵՄ անդամները, ովքեր օրեր շարունակ նախարարության շենքի դիմաց պահանջում են նախարար Արայիկ Հարությունյանի հրաժարականը, նախարարի հետ հանդիպելու առաջարկ էին արել: