ԵՐԵՎԱՆ, 24 ԱՊՐԻԼԻ, ԱՐՄԵՆՊՐԵՍ: Հայոց ցեղասպանությունը վերապրած, Կարսից գաղթած Եպրաքսյա տատիկի՝ ապրիլի 24-ին Ծիծեռնակաբերդի հուշահամալիրում ծաղիկներ խոնարհելու ցանկությունն ի կատար ածվեց:

Ինչպես «Արմենպրես»-ն ավելի վաղ տեղեկացրել էր՝ տատիկի հարազատները Հայոց ցեղասպանության թանգարան-ինստիտուտ հիմնադրամից նախապես անցագիր էին ստացել, որ Եպրաքսյա տատիկին կարողանան մեքենայով հասցնել մինչ հուշահամալիր, դրանից հետո սայլակով ուղեկցել:

Ծաղիկներ խոնարհելուց հետո Եպրաքսյա տատիկը խոսեց նաև լրագրողների հետ, պատմեց, թե ինչպես է գաղթել: «Կարսից գաղթել ենք Օշական, հետո գնացել  Աշտարակ, Եղվարդ, սակայն մարդկանց համար  այնտեղ արդեն տեղ չկար: Հետո գնացել ենք Գյումրի: Այնտեղ հանդիպել ենք Ասքանազ Մռավյանին (եղել է ԽՍՀՄ Կենտրոնական Գործադիր Կոմիտեի անդամ, հեղափոխական, պետական գործիչ, տարբեր թերթերի խմբագիր-խմբ.), ով մեզ տարավ երկու հարկանի տուն: Նա մեզ ասաց՝ մտեք այստեղ, յոլա գնացեք, մինչև տեսնենք, ինչ է լինում»,- պատմեց տատիկը:

Թեև Եպրաքսյա տատիկը ֆիզիկապես չկարողացավ շարունակել պատմությունը, սակայն պատմելու շատ բան ուներ:

Եպրաքսյա Գևորգյանի անձնագրում որպես ծննդյան տարեթիվ նշվում է 1914 թ., սակայն ինչպես նրա թոռն է նշել՝ տատիկը ավելի վաղ է ծնվել և օրերս նշել է 108-ամյակը: