ԵՐԵՎԱՆ, 10  ՍԵՊՏԵՄԲԵՐԻ, ԱՐՄԵՆՊՐԵՍ: Սերբ թենիսիստ Նովակ Ջոկովիչը հաղթեց «Մեծ սաղավարտ»-ի 14-րդ տիտղոսը, ԱՄՆ բաց առաջնության եզրափակիչում գերազանցելով Օլիմպիական խաղերի փոխչեմպիոն արգենտինացի Խուան Մարտին դել Պոտրոյին:

«Արմենպրես»-ի հաղորմամբ՝ Նյու Յորքի կենտրոնական կորտում, որը կրում է Արթուր Էյշի անունը, հետաքրքիր և անզիջում պայքար ծավալվեց: Առաջին սեթում հաղթեց Նովակ Ջոկովիչը 3:6  հաշվով, այնուհետև 6:6 հաշվից հետո դել Պոտրոն զիջեց թայ-բրեյքում (4:7): Սերբը հաղթեց նաև երրորդ սեթում 3:6 հաշվով: Ի վերջո Ջոկովիչը հաղթեց ընդհանուր 3:6, 6:6 (4:7),  3:6 հաշվով:

Մինչ այս թենիսիստները միմյանց դեմ մրցել էին 10 անգամ, որտեղ 8-ում հաղթել էր Ջոկովիչը, իսկ երկուսում՝ դել Պոտրոն:

Նովակ Ջոկովիչը ընթացիկ տարում հաղթում է «Մեծ սաղավարտ»-ի տարվա երկրորդ մրցաշարում: Մինչ այս սերբը հաղթել էր նաև Ուիմբլդոնում: