ԵՐԵՎԱՆ, 28 ՄԱՅԻՍԻ, ԱՐՄԵՆՊՐԵՍ: Հայաստանում շատ հուզիչ և ոգեշնչող փոփոխություններ են տեղի ունենում: Ինչպես հաղորդում է «Արմենպրես»-ը, այս մասին Հայաստանից հեռանալուց հետո Instagram-ի իր էջում գրառում է կատարել հայտնի բրիտանացի երգիչ Էլթոն Ջոնը:

Հրապարակելով Հայաստանի նախագահ Արմեն Սարգսյանի հետ արված լուսանկարը՝ երաժիշտը գրել է. «Մեծ պատիվ է նման ջերմ հյուրընկալության արժանանալ Հայաստանի նախագահ Արմեն Սարգսյանի կողմից: Այս հրաշալի երկրում շատ հուզիչ ու ոգեշնչող փոփոխություններ են տեղի ունենում: Շնորհակալ եմ բոլորին` Դևիդին և ինձ նման կերպ ընդունելու համար»:

Such an honour to be welcomed so warmly by the President of Armenia, Armen Sarkissian. There are many exciting and inspirational changes happening in this beautiful country. Thank-you to everyone for making David and I feel so welcome. @davidfurnish

A post shared by Elton John (@eltonjohn) on May 28, 2018 at 4:15am PDT

Հրապարակելով մեկ այլ նկար, որում նա գրկախառնվում է լսողական խնդիր ունեցող հայ տղայի հետ, Էլթոն Ջոնը գրել է. «Անհնար է նկարագրել այն ուրախությունը, որը զգում ես՝ տեսնելով, թե ինչպես է մարդն առաջին անգամ նորմալ լսում: Այս տղայի մոտ հաջողությամբ լսողական սարքեր են տեղադրվել Starkey Hearing Technologies հիմնադրամի հրաշալի թիմի կողմից: Այս հիանալի բարեգործական հիմնադրամը ողջ աշխարհում մարդկանց տալիս է լսելու շնորհը: Ես և Դևիդն այնքան հպարտ ենք նրանց աջակցելու համար»:

It’s impossible to describe the sheer joy you feel watching someone hear properly for the very first time. This boy was successfully fitted with hearing aids by the brilliant team from @starkeycares @tani_austin This amazing charity travels the world and gives people the gift of hearing. David and I are so proud to support them.

A post shared by Elton John (@eltonjohn) on May 28, 2018 at 4:29am PDT

Էլթոն Ջոնի կողակիցը՝ Դևիդ Ֆըրնիշը, ով ևս այս օրերին Հայաստանում էր, նույնպես գրառումներ է թողել Instagram-ում: Նկարներից մեկում պատկերված է լսողական խնդիր ունեցող մի հայ տղա, ով Starkey Hearing Technologies-ի կողմից լսողական սարքի միջոցով կարողացել է լսել: «Այս տղայի դեմքի արտահայտությունն արդեն ամեն բան ասում է: Մենք նրան առաջին լսողական սարքն ենք տվել և նրա կյանքը փոխվել է: Հիանալի է աշխատել այդ յուրահատուկ մարդկանց հետ»,- նշել է նա:

The look on this boy’s face says it all. We just fitted him with his first hearing aids and his life has been transformed. So amazing to be working with the extraordinary people at @starkeycares again.

A post shared by David Furnish (@davidfurnish) on May 28, 2018 at 4:38am PDT

Մեկ այլ նկարում պատկերված է Արարատ լեռը, որի մասին Ֆըրնիշը գրել է. «Հայաստանում մայրամուտի ժամանակ՝ դիտելով Արարատ լեռան չնաշխարհիկ գեղեցկությունը»:

Looking at the breathtakingly beautiful Mount Ararat as the sun sets over Armenia.

A post shared by David Furnish (@davidfurnish) on May 28, 2018 at 4:44am PDT

Մայիսի 26-ին Հայաստան է ժամանել բրիտանացի հայտնի երգիչ Էլթոն Ջոնը։ Նա ՀՀ նախագահ Արմեն Սարգսյանի և Starkey Hearing Technologies հիմնադրամի տնօրեն Ուիլյամ Օսթինի հետ մայիսի 27-ին «Երևան՝ իմ սեր» հիմնադրամում մասնակցել է առողջական խնդիրներ ունեցող երեխաներին նվիրված միջոցառմանը: Բարեգործական ակցիայի շրջանակներում «Երևան՝ իմ սեր» հիմնադրամի «Հայկ եւ Էլզա Թիթիզյան» մանկական վերականգնողական կենտրոնում Հայաստանի տարբեր մարզերից եւ Արցախից լսողության հետ կապված խնդիրներ ունեցող տարբեր տարիքի երեխաների նվիրաբերվել են 100 լսողական սարքեր: Եռօրյա բարեգործական ակցիայի ընթացքում Starkey Hearing Technologies հիմնադրամը ինչպես երեխաներին, այնպես էլ մեծահասակներին կնվիրաբերի 2500 լսողական սարքեր: Էլթոն Ջոնը հյուրընկալվել է նաև ՀՀ նախագահական նստավայրում, ինչպես նաև ընթրիք է ունեցել նախագահ Արմեն Սարգսյանի և վարչապետ Նիկոլ Փաշինյանի հետ: