Հայ ազգն ունի մեծ ներուժ, հավատացած եմ նաև՝ լուսավոր ապագա. Ռուբեն Վարդանյան
ԵՐԵՎԱՆ, 24 ԱՊՐԻԼԻ, ԱՐՄԵՆՊՐԵՍ: Գործարար և բարերար Ռուբեն Վարդանյանը հույս ունի, որ Հայաստանում ստեղծված ներքաղաքական իրավիճակը փոփոխությունների հնարավորություն կտա:
«Արմենպրես»-ի փոխանցմամբ՝ այս մասին նա ասաց Հայոց ցեղասպանության զոհերի հուշահամալիրում լրագրողների հետ ճեպազրույցում:
«Այդ փոփոխությունը հույս ունեմ ոչ միայն Հայաստանում կլինի, այլև այստեղից դուրս: Քանի որ սփյուռքն ու Հայաստանը բավականին կապված են իրար հետ: Հայ ազգն ունի մեծ ներուժ, հավատացած եմ նաև՝ լուսավոր ապագա»,-ասաց «Հայաստանի զարգացման նախաձեռնություններ» հիմնադրամի (IDeA) համահիմնադիրը:
Նա նաև նկատեց, որ սպասվում է ծանր ու երկարատև աշխատանք, հետևաբար անհրաժեշտ է միասնականություն և իրար հանդեպ հարգանք:
Սերժ Սարգսյանը ապրիլի 23-ին հրաժարական է ներկայացրել ՀՀ վարչապետի պաշտոնից: ՀՀ վարչապետի լիազորությունների կատարման անհնարինության դեպքում վարչապետին փոխարինում է առաջին փոխվարչապետը: Մինչ այդ տասն օր երկրում հավաքներ ու ցույցեր էին՝ ՀՀ Ազգային ժողովի պատգամավոր Նիկոլ Փաշինյանի գլխավորությամբ:
«Ստեղծված իրավիճակն ունի մի քանի լուծում, բայց դրանցից ոչ մեկին ես չեմ գնա։ Դա իմը չէ։ Ես թողնում եմ երկրի ղեկավարի, Հայաստանի վարչապետի պաշտոնը»,-ասել էր Սերժ Սարգսյանը:
Բաժանորդագրվեք մեր ալիքին Telegram-ում