Ժամանակը Երևանում՝ 11:07:36,   23 Հուլիս

Շարմազանովը Վլադիմիր Պուտինի հետագա պաշտոնավարման ընթացքում հայ-ռուսական հարաբերությունների դինամիկ զարգացում է ակնկալում


ԵՐԵՎԱՆ, 19 ՄԱՐՏԻ, ԱՐՄԵՆՊՐԵՍ: ՀՀ Ազգային ժողովի փոխնախագահ Էդուարդ Շարմազանովը վստահություն է հայտնում, որ Ռուսաստանի Դաշնության նախագահի պաշտոնում վերընտրված Վլադիմիր Պուտինի ղեկավարման ընթացքում հայ-ռուսական երկկողմ հարաբերությունները կշարունակեն դինամիկ զարգանալ բոլոր ոլորտներում: «Արմենպրես»-ի հետ զրույցում ԱԺ փոխնախագահը նշեց, որ ՌԴ նախագահի պաշտոնում Վլադիմիր Պուտինի ղեկավարման բոլոր շրջաններում հայ-ռուսական հարաբերությունները դինամիկ զարգացել են:

«Նաև ՀՀ նախագահ Սերժ Սարգսյանի պաշտոնավարման 10 տարում, երբ Վլադիմիր Պուտինն էլ ղեկավարել է Ռուսաստանի Դաշնությունը, բավականին լուրջ առաջընթաց է գրանցվել երկու երկրների երկկողմ հարաբերություններում, մենք անդամակցել ենք Եվրասիական տնտեսական միությանը, երկարաձգվել է Հայաստանում ռուսական ռազմաբազայի գործունեության ժամկետը, ամրապնդվել է համագործակցությունը ՀԱՊԿ շրջանակում»,- ասաց Շարմազանովը:

Նա վստահ է, որ առաջիկայում էլ Վլադիմիր Պուտինի պաշտոնավարման ընթացքում հայ-ռուսական երկկողմ պետական շահերից բխող դաշնակցային հարաբերությունները կշարունակեն զարգանալ բոլոր ոլորտներում` քաղաքական, տնտեսական, ռազմական, մշակութային, հումանիտար և այլն:

ՀՀ ԱԺ փոխնախագահն ընդգծեց, որ հայ-ռուսական հարաբերությունների զարգացումը ի շահ Հայաստանի Հանրապետության և հայ ժողովրդի է:

Ռուսաստանի Դաշնության գործող նախագահ Վլադիմիր Պուտինը մարտի 18-ի նախագահական ընտրությունների արդյունքների նախնական հաշվարկով հավաքել է քվեարկողների ձայների 76,67 տոկոսը: ՌԴ նախագահ Պուտինն իր քաղաքական կարիերայի ընթացքում հավաքել է առավելագույն ձայները. նրա օգտին քվեարկել է 54,4 մլն քաղաքացի, ինչը 5,1 միլիոնով ավելի է, քան 2004 թվականին: Բացի այդ, նրա օգտին քվեարկողների թիվն ավելին է, քան մյուս բոլոր թեկնածուներինը միասին վերցրած:




Լրահոս

Բոլոր նորությունները    






Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
Яндекс.Метрика
Էջի կարգավորումներ