Մալիի նորանշանակ դեսպանը հավատարմագրերի պատճենը հանձնել է Հայաստանի արտգործնախարարին
ԵՐԵՎԱՆ, 12 ՓԵՏՐՎԱՐԻ, ԱՐՄԵՆՊՐԵՍ: ՀՀ արտաքին գործերի նախարար Էդվարդ Նալբանդյանը փետրվարի 11-ին ընդունել է Մալիի նորանշանակ դեսպան Տիեֆինգ Կոնատեին (նստավայրը՝ Մոսկվա) հավատարմագրերի պատճենի հանձնման կապակցությամբ:
Ինչպես «Արմենպրես»-ին տեղեկացրին ՀՀ արտգործնախարարության մամուլի, տեղեկատվության և հասարակայնության հետ կապի վարչությունից, շնորհավորելով և հաջողություններ մաղթելով դեսպան Կոնատեին՝ նախարար Նալբանդյանն ընդգծել է, որ նորանշանակ դեսպանն իր ակտիվ գործունեությամբ կնպաստի Հայաստանի և Մալիի միջև հարաբերությունների առավել ընդլայնմանն ու ամրապնդմանը:
Շնորհակալություն հայտնելով բարեմաղթանքների համար՝ Մալիի դեսպանը վստահեցրել է, որ առավելագույն ջանքերը կներդնի երկու երկրների միջև երկկողմ և բազմակողմ ձևաչափերում համագործակցության խթանման համար։
Հանդիպման ընթացքում անդրադարձ է կատարվել Ֆրանկոֆոնիայի միջազգային կազմակերպության երևանյան գագաթաժողովի նախապատրաստական աշխատանքներին։
Զրուցակիցները մտքեր են փոխանակել իրավապայմանագրային դաշտի ձևավորման, միջազգային կազմակերպությունների շրջանակներում փոխգործակցության, առևտրատնտեսական կապերի զարգացման շուրջ։
Բաժանորդագրվեք մեր ալիքին Telegram-ում