ԵՐԵՎԱՆ, 4 ԴԵԿՏԵՄԲԵՐԻ, ԱՐՄԵՆՊՐԵՍ: Հայաստանում մանրածախ առևտրի շրջանառությունը 2017 թվականի տասն ամիսներին աճել է 6 տոկոսով, մեծածախ առևտրի աճը 23.8 տոկոս է նախորդ տարվա հունվար-հոկտեմբերի համեմատ:  «Արմենպրես»-ի փոխանցմամբ՝ այս են վկայում ՀՀ ազգային վիճակագրական ծառայության տվյալները: Նշյալ ժամանակահատվածում առևտրի ընդհանուր շրջանառությունը  2 տրիլիոն 030 միլիարդ 433.0 միլիոն դրամ է կազմել, աճը նախորդ տարվա տասն ամիսների համեմատ 13.6 տոկոս է: Ընդհանուր առևտրի ծավալում մանրածախ առևտրին բաժին է հասնում 51 տոկոսը, մեծածախին՝ 44.8 տոկոսը, ավտոմեքենաների առևտրին ՝ 4.2 տոկոսը: Ի դեպ՝ ավտոմեքենաների առևտուրը ընթացիկ տարվա տասն ամիսներին աճել է 12.9 տոկոսով:

Ինչպես ցույց են տալիս թվերը, մանրածախ առևտրի շրջանառության կառուցվածքում ամենամեծ չափաբաժինը խանութներին է բաժին հասնում՝ 79.1 տոկոս, երկրորդ տեղում առևտրի այլ օբյեկտներն են՝ 12.2 տոկոս, սպառողական ապրանքների շուկաների մասնաբաժինը 5 տոկոս է, կրպակներինը՝ 2.2, գյուղատնտեսական արտադրանքի շուկաներինը՝ 1.5 տոկոս:

Նախորդ տարվա տասն ամիսների համեմատ՝ առևտրի շրջանառության աճ է գրանցվել խանութների (8.2), գյուղատնտեսական արտադրանքի շուկաների (3.5) և առևտրի այլ օբյեկտների (4.4) շրջանում: Սպառողական ապրանքների շուկաների և կրպակների գծով անկում է գրանցել՝ համապատասխանաբար 14.5 և 3.5 տոկոսներով: