ԵՐԵՎԱՆ, 16 ՆՈՅԵՄԲԵՐԻ, ԱՐՄԵՆՊՐԵՍ: Հայաստանը պատմականորեն և քաղաքական առումով ունի եզակի դիրք Արևելքի և Արևմուտքի միջև կամուրջ հանդիսանալու համար: Հայաստանի Ազգային ժողովում ունեցած ելույթում այս մասին ասաց Նիդերլանդների Թագավորության Սենատի նախագահ Անկի Բրուկերս-Քնոլը:

«Երբեմն կարող է թվալ, որ աշխարհի ուժերն են որոշում գետի ուղղությունները, թեև դա ինչ-որ չափով ճիշտ է, բայց մենք չպետք է մոռանանք, որ կան միջին կարգի երկրներ, ինչպիսիք Հայաստանը և Նիդերլանդները, որոնք ունեն եզակի դիրք շահերի ու ուժերի միջև: Հայաստանի  դեպքում ունեք պատմականորեն, քաղաքականորեն եզակի դիրք` Արևելքի ու Արևմուտքի միջև կամուրջ հանդիսանալու համար: Հույս ունեմ՝ Հայաստանն ապագայում էլ կկատարի այդ դերը, որը օգուտ կբերի մեզ բոլորիս»,- «Արմենպրես»-ի փոխանցմամբ՝ ընդգծեց Նիդերլանդների Սենատի նախագահը:

Անկի Բրուկերս-Քնոլը նշեց, որ ապրում ենք դժվար աշխարհում՝ պատերազմներ, կոնֆլիկտներ, սակայն շեշտեց, որ կան նաև նոր հնարավորություններ:

Նիդերլանդների Թագավորության  Սենատի նախագահն  ընդգծեց, որ Հայաստանը աշխարհի հնագույն երկրներից մեկն է՝ շեշտելով, որ գտնվում է պատմական հողի վրա: