Մարտունու քաղաքապետ Արմեն Ավետիսյանը շնորհակալություն հայտնեց Մաքսիմ Մանուկյանին՝ հայրենակիցների հրավերն ընդունելու համար, ապա նշեց, որ քաղաքի մարզական ոլորտը մշտապես գտնվելու է իր ուշադրության կենտրոնում, մարզիկների համար առավել հարմարավետ պայմաններ ապահովելու խնդիրն իր համար դարձել է գերնպատակ, մանավանդ՝ Մաքսիմի համաշխարհային նվաճումից հետո: «Մաքսիմ Մանուկյանն ապացուցեց, որ մեր հող ու ջուրը կարող են աշխարհի չեմպիոններ ծնել: Այո, մեր երեխաները կոգեւորվեն իրենց հայրենակցի նվաճումներով, կձգտեն կրկնել նրա համաշխարհային նվաճումը: Մենք միայն ու միայն հպարտանում ենք մեր չեմպիոնի գործած սխրանքով»,- նշեց Մարտունու քաղաքապետը:

«Հաճելի է գտնվել հարազատ մարզում, հանդիպել հարազատ դեմքերի, ընդունել ջերմ շնորհավորանքները: Հուսով եմ, որ Մարտունու մարզադպրոցը տարբեր մարզաձեւերում կտա նոր չեմպիոններ»,- նշեց աշխարհի չեմպիոնը: Ընդունելությունից հետո մարզպետ Կարեն Բոթոյանը, քաղաքապետ Արմեն Ավետիսյանը, աշխարհի չեմպիոն Մաքսիմ Մանուկյանը այցելեցին քաղաքի մարզադպրոցի ըմբշամարտի մարզասրահ եւ դիտեցին կրտսեր ըմբիշների ցուցադրական ելույթները: Հետեւելով ըմբիշների մարտերին՝ Մաքսիմը ոգեւորեց, չեմպիոն դառնալու ուղերձ հղեց կրտսեր մարզիկներին՝ հատուկ շեշտելով, որ իր պարապմունքների առաջին մարզասրահը նույնպես համեստ է եղել:

Հանդիպման ավարտին Գեղարքունիքի մարզպետ Կարեն Բոթոյանը եւ Մարտունու քաղաքապետ Արմեն Ավետիսյանը հուշանվերներ հանձնեցին Մաքսիմ Մանուկյանին: Մարտունու քաղաքապետարանի կողմից Մաքսիմին հանձնվեց գեղանկար՝ իր իսկ չեմպիոնի դիմանկարը: «Մաքսիմի հաղթանակով հպարտ են ոչ միայն Արծվանիստ գյուղը, Մարտունի քաղաքն ու նախկին շրջանի գյուղերը, այլ ողջ Գեղարքունիքի մարզը: Մենք հպարտ ենք, որ մեր մարզի ներկայացուցիչը հաղթել է աշխարհի առաջնությունում՝ ձեռք բերելով ինչպես համաշխարհային, այնպես էլ համահայկական ճանաչում»,- նշեց Գեղարքունիքի մարզպետ Կարեն Բոթոյանը:

Խոսրով Խլղաթյան