Պատկերասրահը մեծ թվով ցուցահանդեսներ է կազմակերպելու արտերկրում
ԵՐԵՎԱՆ, 17 ՀՈՒՆՎԱՐԻ, ԱՐՄԵՆՊՐԵՍ: Այս տարի նախատեսվում է բավական մեծ թվով ցուցահանդեսներ կազմակերպել արտերկրում: «Արմենպրես»-ի հաղորդմամբ, հունվարի 17-ին լրագրողների հետ հանդիպման ժամանակ այս մասին տեղեկացրեց Հայաստանի ազգային պատկերասրահի տնօրեն Արման Ծատուրյանը:
«Այս տարի մարտին Նովոսիբիրսկում Ազգային պատկերասրահը Մ. Սարյանի տուն-թանգարանի հետ կազմակերպելու է Սարյանի նկարների ցուցահանդեսը: Այդ ցուցահանդեսում ներկայացվելու են նկարչի՝ պատկերասրահում և թանգարանում գտնվող աշխատանքները»,- նշեց Ծատուրյանը:
Ծատուրյանը հայտնեց, որ ռուսական իմպրեսիոնիզմի նորակառույց թանգարանում կազմակերպվելու է հայկական իմպրեսիոնիզմի ցուցահանդես:
«Ցուցադրվելու է մոտ 50 աշխատանք: Ամբողջ ցուցահանդեսի հետ կապված ծախսերը կատարում է ռուսական կողմը: Հրատարակվելու է ցուցահանդեսի կատալոգը: Շատ կարևոր եմ համարում այն, որ ցուցահանդեսի կազմակերպչական աշխատանքը պատկերասրահն է իրականացնելու, քանզի մենք կարող ենք ավելի հասանելի դարձնել այնտեղի այցելուների համար հայ նկարիչների մասին պատկերացումները»,- ասաց նա:
Պատկերասրահի տնօրենի խոսքով` կազմակերպվելու է նաև երկու ցուցահանդես Լեհաստանի Սոպոտ քաղաքում:
Բաժանորդագրվեք մեր ալիքին Telegram-ում