Նորա Դայանը մնայուն արժեք է ստեղծել մշակութաբանների և թանգարանագետների համար
ԵՐԵՎԱՆ, 30 ՆՈՅԵՄԲԵՐԻ, ԱՐՄԵՆՊՐԵՍ: Պատմաբան, մշակութաբան, թանգարանագետ Նորա Դայանի «Մշակութային և բնության պահպանության ու պաշտպանության խնդիրները միջազգային կոնվենցիաներում և ՀՀ օրենքներում» ժողովածուի շնորհանդեսն անցկացվեց նոյեմբերի 30-ին` Հովհաննես Կարապետյանի անվան երկրաբանական թանգարանում: «Անդրադարձել եմ բոլոր մշակութային կոնվենցիաներին, որոնց միացել է Հայաստանի Հանրապետությունը: Ներկայացրել եմ դրանց հիմնական դրույթները, հասկանալի ձևով բացատրել բովանդակությունը, ոչ թե ձևակերպումները: Յուրաքանչյուր պարբերությունից հետո հղում կա»,-«Արմենպրես»-ի հաղորդմամբ` նշեց հեղինակը:
Նորա Դայանի խոսքով`գրքում ներկայացրել է նաև օրենսդրությունը: «Միանալով կոնվենցիաներին` ստեղծում ենք ՀՀ օրենսդրությունը և մեր օրենքները: Երրորդ մասում կոնվենցիաներում և իրավական ակտերում օգտագործված տերմինների բառարան է: Օրինակ` «մշակութային արժեք» հասկացությունը տարբեր կոնվենցիաներում տարբեր կերպ է օգտագործվում: Կա չորս տարբերակ, որոնց մասին խոսվում է գրքում»,-ասաց Նորան:
Ըստ հեղինակի` գիրքը հիմնականում նախատեսված է մշակութաբանությամբ, թանգարանագիտությամբ զբաղվող մարդկանց համար:
Նորա Դայանը շեշտեց, որ գիրքը ստեղծելու գաղափարն առաջացել է 2010 թվականին, երբ աշխատում էր մշակույթի նախարարությունում: Ուրախ է, որ ընկերների աջակցությամբ իրագործել է իր մտահղացումը:
Նորա Դայան սովորել է ԵՊՀ պատմության ֆակուլտետում: Երկար տարիներ աշխատել է Սարդարապատի Հայաստանի ազգագրության պետական թանգարանում: Կազմակերպել է մի շարք ցուցահանդեսներ ինչպես Հայաստանի սահմաններում, այնպես էլ Հայաստանից դուրս` Ռուսաստանում, Հնդկաստանում: 1995-2001թթ եղել է ՀՀ մշակույթի նախարարության Մշակութային արժեքների պահպանության վարչության պետ:
Բաժանորդագրվեք մեր ալիքին Telegram-ում