Մոսկվայում կկայանա Հովիկ Աբրահամյանի ու Դմիտրի Մեդվեդևի հանդիպումը
1 րոպեի ընթերցում
![Մոսկվայում կկայանա Հովիկ Աբրահամյանի ու Դմիտրի Մեդվեդևի հանդիպումը](http://armenpress.am/resized/480/static/news/b/2015/07/811450.jpg)
ԵՐԵՎԱՆ, 6 ՀՈՒԼԻՍԻ,ԱՐՄԵՆՊՐԵՍ:Հայաստանի և Ռուսաստանի վարչապետներ Հովիկ Աբրահամյանն ու Դմիտրի Մեդվեդևը հուլիսի 9-ին Մոսկվայում կքննարկեն Եվրասիական տնտեսական միության շրջանակներում համագործակցության հարցը:«Արմենպրես»-ի փոխանցմամբ՝ այդ մասին ասված է ՌԴ կառավարության պաշտոնական կայքում տեղադրված տեղեկատվության մեջ:
«Հանդիպման ընթացքումկքննարկվեն երկկողմ առևտրատնտեսական և ԵՏՄ շրջանակներում ինտեգրացիոն համագործակցությանն ուղղված արդիական հարցեր»,- նշված է հաղորդագրության մեջ:
Հուլիսի 1-ին Հովիկ Աբրահամյանը հեռախոսազրույց էր ունեցել Դմիտրի Մեդվեդևի հետ: Երկու երկրների կառավարությունների ղեկավարները քննարկել էին հայ-ռուսական դաշնակցային հարաբերություններին առնչվող մի շարք հարցեր: Զրուցակիցները կարևորել էին փոխգործակցության ակտիվացումը տարբեր ոլորտներում: Անդրադարձ էր կատարվել նաև հունիսի 25-26-ին Երևանում կայացած Հայաստանի Հանրապետության և Ռուսաստանի Դաշնության միջև տնտեսական համագործակցության միջկառավարական հանձնաժողովի նիստի արդյունքներին և համատեղ նախատեսվող նախագծերին ու ծրագրերին: