«Օլիմպիոնիկ» մուլտֆիլմը կպատմի Վարազդատ արքայի բռնցքամարտի հաջողությունների մասին
ԵՐԵՎԱՆ, 24 ՄԱՐՏԻ, ԱՐՄԵՆՊՐԵՍ: Սցենարի ավարտուն տարբերակի մշակումից և վերջնական նախապատրաստական աշխատանքներից հետո «Ռոբերտ Սահակյանց պրոդաքշն» ընկերությունը 2015 թվականի հունվարի 1-ից կսկսի իր նոր` «Օլիմպիոնիկ» լիամետրաժ անիմացիոն մուլտֆիլմի նկարահանման աշխատանքները: Մուլտֆիլմի նախագիծը ստացել է ՀՀ կառավարության ֆինանսական աջակցությունը: «Արմենպրես»-ի թղթակցի հետ զրույցում ընկերության տնօրեն Դավիթ Սահակյանցը տեղեկացրեց, որ Կառավարության կողմից տարեկան տրվող 80 միլիոն դրամի շնորհիվ, իրենք մուլտֆիլմը կնկարահանեն ոչ թե նախանշված հինգ, այլ երեք տարում:
«Ավելացված ֆինանսական աջակցության շնորհիվ մենք տեխնիկա ենք գնելու, ավելանալու է աշխատանքում ներգրաված մարդկանց քանակը: Այժմ մուլտֆիլմը նախագծային փուլում է: Գաղափարի վրա աշխատում ենք անցած տարվանից »,- ասաց Սահակյանցը: Նա նշեց, որ նոր մուլտֆիմը պատմելու է 4-րդ դարի երկրորդ կեսին տեղի ունեցած իրադարձությունների մասին, երբ Մեծ Հայքի` այն ժամանակ դեռ պատանի Վարազդատ արքան, մասնակցելով «բռունցքներով մարտ» կոչվող մրցմանը, կարողացել է դառնալ 291-րդ Օլիմպիական խաղերի հաղթող:
«Մուլտֆիլմի գաղափարը հիմնված է Վարազդատ արքայի մասին պատմական փաստի վրա, քանի որ նա հաղթում է Օլիմպիական խաղերում»,- պարզաբանեց մուլտիպլիկատորը` հավելելով, թե դեռևս վաղ է խոսել ավարտուն տարբերակի մասին, սակայն աշխատանքը տարբերվելու է ոճական առումով, և ինչպես յուրաքանչյուր մուլտֆիլմի` այնպես էլ «Օլիմպիոնիկ»-ի դեպքում հանդիսատեսը կզգա ստուդիային բնորոշ ձեռագիրը, դինամիկան:
Լիամետրաժ անիմացիոն մուլտֆիլմը նախաձեռնողների կանխատեսմամբ կլինի ուրախ, հագեցած հումորով և երգերով: Որպես նկարահանման ավարտ նախանշվում է 2017 թվականի վերջը: Նախքան «Օլիմպիոնիկ»-ը «Ռոբերտ Սահակյանց պրոդաքշն»-ը 2014 թվականի նոյեմբերին հանրության դատին կհանձնի «Անահիտ» լիամետրաժ անիմացիոն մուլտֆիլմը, որը Ղազարոս Աղայանի համանուն հեքիաթի` մոտ 90 րոպե տևողությամբ էկրանավորված տարբերակն է:
Մարտի 6-ի նիստում ՀՀ կառավարությունը մշակույթի նախարարությանը կհատկացնի 49 մլն դրամ` երեք նախագիծ իրականացնելու համար: Մասնավորապես, նշված միջոցներով նախատեսվում է մաեստրո Հովհաննես Չեքիջյանին նվիրված գիրք-ալբոմի հրատարակում, «Դվին» հնավայրի պեղումների և պեղավայրի ամրակայման աշխատանքների իրականացում, աջակցություն ժամանակակից հայ մուլտիպլիկացիայի զարգացմանը:
Տաթևիկ Գրիգորյան
Բաժանորդագրվեք մեր ալիքին Telegram-ում