ԱՄՆ պետքարտուղարությունը հավանություն է տվել Թայվանին 75 մլն դոլարի ռազմական սարքավորումների վաճառքին

1 րոպեի ընթերցում

ԵՐԵՎԱՆ, 22 ՓԵՏՐՎԱՐԻ, ԱՐՄԵՆՊՐԵՍ: ԱՄՆ պետքարտուղարությունը հավանություն է տվել Թայվանին 75 միլիոն դոլար գումարի ռազմական նշանակության սարքավորումների վաճառքին: «Արմենպրես»-ի փոխանցմամբ՝ այս մասին հաղորդում է Reuters-ը՝ վկայակոչելով Պենտագոնը։

Վաճառքը տեղի է ունենում Թայվանի և մայրցամաքային Չինաստանի միջև լարվածության ֆոնին։

Ըստ Պենտագոնի՝ փաթեթը կներառի գլոբալ դիրքավորման համակարգի (GPS) ընդունիչներ, հաղորդակցության սարքավորումներ, տեխնիկական ծառայություններ և այլ օժանդակ տարրեր՝ կապված լոգիստիկայի ու ծրագրային աջակցության հետ։

Առաջարկվող վաճառքն, ըստ Պենտագոնի, «կծառայի ԱՄՆ-ի ազգային, տնտեսական շահերին և անվտանգության շահերին», կնպաստի Թայվանի զինված ուժերի արդիականացմանը և «աջակցություն կցուցաբերի տարածաշրջանում քաղաքական կայունության, ռազմական հավասարակշռության և տնտեսական առաջընթացի պահպանման գործում»:

Սարքավորումները նպատակ ունեն «բարձրացնել ստացողի կարողությունը՝ դիմակայելու ընթացիկ և ապագա սպառնալիքներին` կապի միջոցների ու ցանցային անվտանգության բարելավման հաշվին»:

Բաժանորդագրվեք մեր ալիքին Telegram-ում