ԵՐԵՎԱՆ, 6 ՆՈՅԵՄԲԵՐԻ, ԱՐՄԵՆՊՐԵՍ: Հայաստանի գրողների միությունն ու Հայ բարեգործական ընդհանուր միությունը համատեղ ջանքերով անցկացրին «Մինչև 27 տարեկան երիտասարդ ստեղծագործողների մրցանակաբաշխություն»-ը, որի արդյունքներն ամփոփվեցին նոյեմբերի 6-ին:

«Արմենպրես»-ի հաղորդմամբ՝ միության նախագահ Էդվարդ Միլիտոնյանը հիշեցրեց, որ մրցանակաբաշխությունն անցկացնում են երկրորդ անգամ: Առաջինը տեղի է ունեցել 2022 թվականին:

«Այս տարի քսանից ավելի երիտասարդ գրող է մասնակցել մրցույթին, ինչն ուրախալի է, որովհետև 2022-ին ավելի քիչ թվով մասնակիցներ կային»,-նշեց նա:

Միլիտոնյանի խոսքով՝ և՛ ինքը, և՛ հանձնաժողովի անդամները կարծում են՝ շնորհալի գրողները շատ են, պարզապես պետք է ճանապարհ հարթել նրանց համար:

«Երիտասարդությունը հրաշալի է, սակայն առավել լավ է, երբ երիտասարդները քայլ են անում գրականության, մշակույթի ոլորտում»,-ասաց Միլիտոնյանը՝ մրցանակակիրներին խորհուրդ տալով ընթերցել ոչ միայն մեծերի գրականությունը, այլև իրենց ընկերների, հասակակիցների գործերը՝ վստահեցնելով, որ հետաքրքիր բացահայտումներ կարող են անել:

«Պոեզիա» անվանակարգում առաջին մրցանակին արժանացավ Հայկ Սիրունյանը, երկրորդ մրցանակը տրվեց Վովա Արզումանյանին, երրորդ մրցանակին արժանացան Լևոն Բեժանյանը, Արման Վարդանյանը, Արմենուհի Ավետիսյանը:

«Արձակ» անվանակարգում առաջին մրցանակին արժանացավ Հասմիկ Կարապետյանը, եկրորդ մրցանակը տրվեց Նարե Հարոյանին, իսկ երրորդը՝ Աննա Հակոբյանին:

Մրցանակակիրների ստեղծագործությունները հրապարակվել են «Գրական թերթ»-ում և դրական արձագանքի արժանացել: 

Լուսանկարները՝ Հայկ Մանուկյանի