2022-ի սեպտեմբերին Ադրբեջանի ագրեսիայի հետևանքով տեղահանվել է առնվազն 1427 երեխա. ՀՀ ԱԳՆ

ԵՐԵՎԱՆ, 4 ՀՈՒԼԻՍԻ, ԱՐՄԵՆՊՐԵՍ: 2022 թվականի սեպտեմբերին Ադրբեջանի ագրեսիայի հետևանքով առնվազն 1427 երեխա տեղահանվել է, խախտվել են նրանց հիմնական իրավունքները: «Արմենպրես»-ի փոխանցմամբ՝ այս մասին «Թվիթեր»-ի իր էջում հայտնել է ՀՀ ԱԳՆ մամուլի խոսնակ Անի Բադալյանը:

«Խոսելով երեխայի իրավունքների մասին՝ 2022 թվականի սեպտեմբերին Ադրբեջանի ագրեսիայի ընթացքում տարածքի կրթական հաստատությունները ենթարկվել են ուղղակի գնդակոծության, ինչի հետևանքով երեխաները զրկվել են կրթության իրավունքից, առնվազն 1427 երեխա տեղահանվել է, խախտվել են նրանց հիմնական իրավունքները»,- գրել է նա՝ տարածելով ՄԱԿ-ի 2022 թվականի հակամարտութոյւններից տուժած երեխաների մասին զեկույցը:

When referring to child rights: during #Azerbaijan’s 2022 Sept aggression educational institutions in territory of were under direct fire, as result children were deprived of right to education, at least 1427 children were displaced, their fundamental rights were violated. https://t.co/sHKt3wY1ei

— Ani Badalyan, Spokesperson of MFA of Armenia (@ArmSpoxMFA) July 4, 2023

Ըստ զեկույցի` 2022 թվականին ամբողջ աշխարհում մոլեգնում էին զինված հակամարտությունները, որոնք կործանարար հետևանքներ են ունեցել երեխաների համար։ ՄԱԿ-ի վերջին զեկույցը ցույց է տալիս, որ ավելի քան 8800 երեխա սպանվել կամ խեղվել է, իսկ ավելի քան 7600-ը հավաքագրվել են զինված ուժերի կողմից: Դպրոցների և հիվանդանոցների վրա հարձակումների թիվը նույնպես աճել է 112% -ով:

Խոսնակն ընդգծել է, որ Լաչինի միջանցքի շրջափակումն անդառնալի ազդեցություն է թողնում։ Ընտանիքներից բաժանվելը, տեղահանությունը, հոգեբանական տառապանքը սարսափելի իրողություններ են, որոնց բախվում են Լեռնային Ղարաբաղի երեխաները:

«Այժմ 20.000 երեխա զրկված է հուսալի կրթություն ստանալու հանարավորությունից»,- նկատել է նա։