ԵՄ-ն դատապարտել է Ադրբեջանի դեսպանի կողմից ԵԽ պատգամավորներին ուղղված սպառնալիքը

ԵՐԵՎԱՆ, 29 ՀՈՒՆԻՍԻ, ԱՐՄԵՆՊՐԵՍ։ Եվրոպական միությունը դատապարտել է ԵՄ-ում Ադրբեջանի դեսպան Վագիֆ Սադիգովի կողմից Եվրախորհրդարանի անդամներին ուղղված ակնհայտ սպառնալիքը, որը հնչեցվել է հայ-ադրբեջանական սահման ԵԽ պատվիրակության այցից հետո։ «Արմենպրես»-ի փոխանցմամբ՝ այս թեմայով հոդված է հրապարակել OC Media լրատվական հարթակը։

Սադիգովը, որը նաև Բելգիայում և Լյուքսեմբուրգում Ադրբեջանի դեսպանն է, հունիսի 23-ին Twitter-ում գրառում էր կատարել՝ ի պատասխան Եվրախորհրդարանի պատգամավորների պատվիրակության՝ Հայաստան կատարած այցի, որի ընթացքում պատվիրակության անդամները մեկնել էին Ադրբեջանի հետ սահմանի մոտ:

Սադիգովը տեղադրել էր ադրբեջանական արտադրության դիպուկահար հրացանի պատկեր՝ հետևյալ տեքստով.

«Նրանք գիտեն, թե ինչ են անում պաշտպանվելու համար։ Ադրբեջանում արտադրված «Իստիգլալ ԻՍՏ-14.5» դիպուկահար հրացանն ունի մոտ 3000 մ կրակի արդյունավետ հեռահարություն։ Հեռո՛ւ մնացեք Ադրբեջանի պետական սահմանից…»։

They know what they are doing to protect themselves. The Istiglal IST-14.5 anti-materiel sniper rifle produced in Azerbaijan has the effective firing range of about 3,000 m. Guys, keep clear of Azerbaijani state border... pic.twitter.com/k9isu9iQyo

— Vaqif Sadıqov (@VaqifS) June 22, 2023

Մեկնաբանելով Սադիգովի գրառումը՝ ԵՄ խոսնակը OC Media-ին հայտնել է, որ իրենք տեղյակ են դրա մասին։

«Մենք դատապարտում ենք նման պահվածքը, որը բացարձակապես անընդունելի է ԵՄ-ում հավատարմագրված դեսպանի համար», - ասել է խոսնակը։

Այս սպառնալիքին հունիսի 26-ին անդրադարձել էր նաև Եվրախորհրդարանի անվտանգության և պաշտպանության հարցերով ենթահանձնաժողովի ղեկավար Նատալի Լուազոն։

«Արդյո՞ք սա սպառնալիք է Եվրախորհրդարանի անդամների նկատմամբ։ Իսկապե՞ս այն գալիս է ադրբեջանցի «դիվանագետից»։ Ի՞նչ մակարդակի է իջել Ադրբեջանի դիվանագիտությունը։ Արդարադատության միջազգային դատարանի որոշումը չհարգելով և 120 000 մարդկանց պատանդառության մեջ պահելու մեջ հպարտանալու ոչինչ չկա։ Արդյո՞ք դա է ձեր նյարդերին ստիպում տեղի տալ: Մենք՝ ուժեղ արժեքներ ունեցող եվրոպացիներս, տպավորված չենք։ Մենք կշարունակենք աջակցել խաղաղությանը և Լեռնային Ղարաբաղի ժողովրդի նկատմամբ հարգանքին», - գրել էր Լուազոն Twitter-ի իր էջում։

Is this a threat towards Members of the European Parliament ? Does it really come from an Azerbaïdjani « diplomat » ? To what level has diplomacy fallen ? Disrespecting an ICJ decision and taking 120 000 human beings hostage, there is nothing to be proud of. Is it what makes… https://t.co/N0N8WPSGLA

— Nathalie Loiseau (@NathalieLoiseau) June 26, 2023

Սադիգովի գրառումը քննադատել է նաև ԵՄ-ում Ադրբեջանի նախկին դեսպան Արիֆ Շահմարլին՝ դա անվանելով «ծիծաղելի և անընդունելի»։ Շահմարլիի կարծիքով՝ այն փաստը, որ Սադիգովն օգտագործել է ադրբեջանական արտադրության դիպուկահար հրազենը Twitter-ում հռետորաբանության համար, նման է երկրի նախագահ Իլհամ Ալիևի հռետորաբանությանը։ Սադիգովի գրառումը, ըստ նախկին դեսպանի, կարող էր պատվիրված լինել։

Սադիգովը հրաժարվել է մեկնաբանություն տալ OC Media-ին։ Ադրբեջանի ԱԳՆ-ն նույնպես միջադեպի առնչությամբ մեկնաբանություն չի տվել։