Հայ փրկարարները Թուրքիայում փլատակներից ողջ դուրս են բերել 8-ամյա աղջկա

ԵՐԵՎԱՆ, 11 ՓԵՏՐՎԱՐԻ, ԱՐՄԵՆՊՐԵՍ։ Հայաստանից Թուրքիայի աղետի գոտի մեկնած հայ փրկարարները թուրք փրկարարների հետ Ադըյաման քաղաքում կարողացել են փլատակներից ողջ դուրս բերել 8-ամյա աղջկա։

«Արմենպրես»-ի փոխանցմամբ, այս մասին հայտնել է Թուրքիայի մեջլիսի հայ պատգամավոր Գարո Փայլանը։

«Հայաստանի փրկարար խումբը Թուրքիայի աղետների և արտակարգ իրավիճակների կառավարման վարչության խմբի հետ Ադըյամանում ութամյա աղջկա են փրկել։ Զորակցությունը կյանք է»,- գրել է Փայլանը։

Ermenistan kurtarma ekibi AFAD ekibi ile birlikte Adıyaman’da sekiz yaşında bir kızı canlı kurtardı.

Dayanışma yaşatır!

pic.twitter.com/UMJFr7cizy

— Garo Paylan - Կարօ Փայլան (@GaroPaylan) February 11, 2023

Թուրքիան ցնցած 7,7 մագնիտուդով երկրաշարժից անմիջապես հետո Հայաստանը հայտնել է օգնելու պատրաստակամության մասին։ Այդ նպատակով Թուրքիայի աղետի գոտի էր մեկնել 27 հայ փրկարար։

Փետրվարի 11-ին հայ-թուրքական ցամաքային սահմանով Թուրքիա է ուղարկվել նաև 100 տոննա մարդասիրական օգնություն։

Երկրաշարժի հետևանքով Թուրքիայում զոհերի թիվը առնվազն 20 հազար 655 է, վիրավորների թիվը՝ ավելի քան 80 հազար։ Սա 1939 թվականից ի վեր այդ երկրում գրանցված ամենաուժեղ երկրաշարժն է։