ԵՐԵՎԱՆ, 25 ՕԳՈՍՏՈՍԻ, ԱՐՄԵՆՊՐԵՍ: «Սիմֆոնիկ Երևան» միջազգային երաժշտական փառատոնի 12-րդ համերգի ընթացքում հնչել են Էդվարդ Էլգարի, Սեմյուել Բարբերի, Տիգրան Մանսուրյանի, Ալեքսեյ Շորի, Ջոն Բրաննինգի ստեղծագործությունները։

«Արմենպրես»-ի փոխանցմամբ՝ համերգը ղեկավարում էր դիրիժոր Դանիել Ռայսկինը, ով Ուինիփեգի սիմֆոնիկ նվագախմբի գեղարվեստական ղեկավարն է, Սլովակիայի ֆիլհարմոնիկ նվագախմբի գլխավոր դիրիժորը, ինչպես նաև՝ Բելգրադի ֆիլհարմոնիկ նվագախմբի գլխավոր հրավիրյալ դիրիժորը։

Դանիել Ռայսկինը «Սիմֆոնիկ Երևան» փառատոնի ընթացքում ղեկավարել է 5 համերգ։ Ըստ նրա՝ հնարավոր չէ կապ հաստատել ունկնդրի հետ, եթե կոնտակտ չկա նվագախմբի, երաժիշտների հետ։

Խոսելով Հայաստանի պետական սիմֆոնիկ նվագախմբի հետ համագործակցության մասին՝ դիրիժորը նկատել է, որ մարդկային և պրոֆեսիոնալ կոնտակտը կոլեկտիվի հետ շատ հեշտ է ստացվել։

«Մշակութային ընդհանրությունները համախմբում են մեզ։ Դպրոցը, հատկապես լարայինների, շատ հոգեհարազատ է ինձ, ես ինքս նույն դպրոցն եմ անցել։ Ինձ Հայաստանի և հայկական երաժշտության հետ երկար տարիներ են կապում, սովորել եմ հայկական ծագում ունեցող նշանավոր ալտահար Քիմ Քաշքաշյանի մոտ, ունեմ բազմաթիվ հայ ընկերներ, ներկայացրել եմ հայ կոմպոզիտորների բազմաթիվ ստեղծագործություններ, ձայնագրել եմ Խաչատրյանի կոնցերտներն ու ռապսոդիաները։ Այնպես որ՝ ինձ համար սա մի մշակույթ է, որտեղ ես ինձ շատ հարմար եմ զգում»,- ասում է նա:

Հայաստանի պետական սիմֆոնիկ նվագախմբի լարային կազմի հետ ելույթ է ունեցել Չինաստանը ներկայացնող կիթառահար Շվովֆեյ Յանը։ Վերջինս իր միջազգային հաջողության շնորհիվ ելույթ է ունեցել ավելի քան 50 երկրների հեղինակավոր համերգասրահներում՝ աշխարհի առաջատար նվագախմբերի հետ:

Օգոստոսի 12-25-ը Երևանում անցկացվել է Symphonic Yerevan միջազգային երաժշտական փառատոնը, որը կազմակերպել են Հայաստանի պետական սիմֆոնիկ նվագախումբը և Մշակույթի աջակցման եվրոպական հիմնադրամը (EUFSC, նախագահ՝ Կոնստանտին Իշխանով)։

Փառատոնի ռեզիդենտ կոմպոզիտորն է Ալեքսեյ Շորը։