ԵՐԵՎԱՆ, 13 ՀՈՒՆՎԱՐԻ, ԱՐՄԵՆՊՐԵՍ: Համայնքներում մանկապարտեզների շինարարությունը կառավարությունը կհամաֆինանսավորի 70-80 տոկոսով։

Ինչպես տեղեկացնում է «Արմենպրես»-ը, այս մասին կառավարության նիստի ժամանակ նշեց ՀՀ վարչապետ Նիկոլ Փաշինյանը։

Երկրի ղեկավարի խոսքով` եթե համայնքը պատրաստակամություն է հայտնում 20 տոկոսով ֆինանսավորել մանկապարտեզի կառուցումը կամ հիմնանորոգումը, ապա կառավարությունը կհամաֆինանսավորի:

«Այստեղից այլ պարտավորություն էլ պետք է համայնքը վերցնի, որ շահագործման պահից հետո մանկապարտեզի կարիքներն ինքը պետք է հոգա։ Խոսքը պահպանման ծախսերի, աշխատավարձի ֆոնդի մասին է։ Ըստ այդմ, այն համայնքներին, որոնք հայտ կներկայացնեն մանկապարտեզի նորոգման կամ կառուցման համար, կառավարությունը 70-80 տոկոսով ֆինանսավորում կիրականացնի»,- նշեց վարչապետը:

Փաշինյանն ընդգծեց` սա անում են 5 տարում 500 մանկապարտեզ կառուցելու և նորոգելու կառավարության նախագծի համար, և այս բանաձևը, ըստ Փաշինյանի, իրատեսական է դարձնում սահմանած նշաձողին հասնելը: