Քոչարյանը կարծում է, որ իշխանափոխության համար անհրաժեշտ զանգվածային ընդզվում հասունացած չէ

ԵՐԵՎԱՆ, 27 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ երկրորդ նախագահ Ռոբերտ Քոչարյանը հայտարարեց, որ իշխանափոխության համար պետք են զանգվածային ընդվզումներ, սակայն այսօր ինքը չի տեսնում, որ այդ ընդվզումները հասունացել են:

«Ոչ թե 10 հազար մարդ պետք է լինի, այլ պետք է լինի զանգվածային ընդվզում։ Մենք այսօր չենք տեսնում, որ դա հասունացած է։ Դա հիասթափեցնում է մեր կողմնակիցների մի հատվածին, որոնք պատրաստ են այդ պայքարին, բայց մենք նաև չենք կարող այդ մարդկանց չպատրաստված տանել նման փորձությունների։ Մենք պատրաստ ենք և պատրաստում ենք այդ զանգվածային ընդվզումը, անելու ենք, այդ ճանապարհին ենք»,- «Արմենպրես»-ի հաղորդմամբ` ամփոփիչ ասուլիսի ժամանակ ասաց Քոչարյանը:

Երկրորդ նախագահը հիշեցրեց իր՝ նախկինում արած հայտարարությունն այն մասին, որ 1.5 տարի հետո արտահերթ ընտրություններ են լինելու:

«Այդ ժամկետների մեջ տեղավորվելու ենք։ Ինչ-որ բաներ կան, որ պիտի հասունանան։ Ինքս պատրաստ եմ ամեն ինչի, բայց պետք է զգաս, որ դա լինելու է ոչ թե այսպես ասած՝ ինքնահրկիզման ակտ, այլ լինելու են քայլեր, որոնք մեծ հավանականությամբ պետք է բերեն հաջողության։ Հակառակ դեպքում մեզ մեղադրելու են՝ բա դուք առաջնորդ եք, ինչո՞ւ չեք հաշվարկել», -եզրափակեց Քոչարյանը: