«Արմենպրեսը» համագործակցության համաձայնագիր է կնքել Իտալիայի «Նովա» գործակալության հետ
ԵՐԵՎԱՆ, 6 ՄԱՅԻՍԻ, ԱՐՄԵՆՊՐԵՍ: Հայաստանի պետական «Արմենպրես» լրատվական գործակալությունը և Իտալիայի «Նովա» լրատվական գործակալությունը ստորագրել են համագործակցության համաձայնագիր: Փաստաթուղթը հեռահար ստորագրել են «Արմենպրես» գործակալության տնօրեն Արամ Անանյանը և «Նովա» գործակալության գործադիր տնօրեն Ֆաբիո Սքուիլլանտեն:
Հայ-իտալական լրատվական նոր կամուրջների կառուցման գործում մեծ է Իտալիայում ՀՀ արտակարգ և լիազոր դեսպան Ծովինար Համբարձումյանի ներդրումը:
«Հայաստանի և Իտալիայի լրատվական գործակալությունների միջև ստորագրված համաձայնագիրը լավ հնարավորություն է ամրապնդելու մասնագիտական համագործակցությունը, ինչպես նաև խթանելու տեղեկատվության փոխանակումը: Կարծում ենք՝ համաձայնագրի ստորագրումը երկու գործակալությունների համար գործակցության նոր էջ կբացի»,-նշել է «Արմենպրես»-ի տնօրեն Արամ Անանյանը:
Համաձայնագրով` կողմերը պայմանավորվել են զարգացնել մեդիա ոլորտում երկկողմ մասնագիտական համագործակցությունը` նպատակ ունենալով ամրապնդել փոխգործակցությունը Հայաստանի Հանրապետության և Իտալիայի Հանրապետության միջև:
Ստորագրված փաստաթղթի համաձայն` կողմերը կօգտագործեն կուտակված փորձը` տարբեր նախագծերի համատեղ իրականացման համար։
Իտալիայի «Նովա» լրատվական գործակալությունը խոշորագույն իտալալեզու լրատվական աղբյուրն է Բալկաններում, Մերձավոր Արևելքում և Աֆրիկայում, ինչպես նաև խոշորագույն իտալական գործակալությունը` միջազգային քաղաքականության և տնտեսությանը վերաբերող հրապարակումներով:
«Արմենպրես» լրատվական գործակալությունը հիմնադրվել է 1918 թվականի դեկտեմբերի 18-ին (այն ժամանակ՝Հայկական հեռագրական գործակալություն): Գործակալությունն ունի հարուստ տեղեկատվական եւ լուսանկարչական արխիվ, որոնք Հայաստանի եւ տարածաշրջանի յուրահատուկ պատմությունն են ներկայացնում: Միայն ֆոտոարխիվում ներկայումս պահվում է շուրջ 100 հազար լուսանկար: Գործակալությունն օրական հրապարակում է շուրջ 350 լուր հայերեն, ռուսերեն, անգլերեն, ֆրանսերեն և արաբերեն լեզուներով։
«Արմենպրես»-ը միջազգային լրատվական 4 կազմակերպությունների անդամ է: Գործակալությունը Հայաստանը ներկայացնում է ԱՊՀ Ինֆորմխորհրդում, Սևծովյան տարածաշրջանի ազգային լրատվական գործակալությունների խորհրդում, Հարավարևելյան Եվրոպայի և բալկանյան պետությունների ազգային լրատվական գործակալությունների խորհրդում (դիտորդ) և Լրատվական գործակալությունների համաշխարհային կոնգրեսում: 2014-2016թթ. «Արմենպրես»-ը ղեկավարել է Սևծովյան տարածաշրջանի ազգային լրատվական գործակալությունների խորհուրդը, որի և ԱՊՀ Ինֆորմխորհրդի 2014թ. նիստերն անցկացվել են Երևանում:
«Արմենպրես»-ը երկկողմ են գործակցության պայմանագրեր ունի աշխարհի ավելի քան 20 առաջատար լրատվական գործակալությունների հետ, որոնց շուրջ մեկ երրորդը կնքվել է վերջին յոթ տարիներին: Գործընկերների թվում են ՏԱՍՍ-ը, Ռոյթերսը, Սինխուան, ԻՌՆԱՆ, ՄԵՆԱՆ, ԲՏԱ-ն, Ագերպրեսը, ԲԵԼՏԱՆ, Կազինֆորմը, «Լետա»-ն, «Յոնհապ»-ը, շատ այլ լրատվամիջոցներ, որոնց հետ իրականացվում է տեղեկությունների եւ լուսանկարների փոխանակում:
Գործակալության աշխատակիցները պարբերաբար մասնակցում են միջազգային տարբեր համաժողովների, լրատվական ցուցահանդեսների և ուսուցման ծրագրերի:
Բաժանորդագրվեք մեր ալիքին Telegram-ում