Ժամանակը Երևանում՝ 11:07:36,   21 Հունվար

ՍԴՀԿ-ն իշխանությանը հորդորում է համախոհության մթնոլորտ ստեղծելուն միտված գործնական քայլեր ձեռնարկել

ՍԴՀԿ-ն իշխանությանը հորդորում է համախոհության մթնոլորտ ստեղծելուն միտված 
գործնական քայլեր ձեռնարկել

ԵՐԵՎԱՆ,  1 ԴԵԿՏԵՄԲԵՐԻ, ԱՐՄԵՆՊՐԵՍ: Սոցիալ դեմոկրատ Հնչակյան կուսակցությունը հայտարարություն է տարածել Հայաստանում ստեղծված ներքաղաքական իրավիճակի վերաբերյալ: Ինչպես հաղորդում է «Արմենպրես»-ը, հայտարարության մեջ նշվում է, որ Սոցիալ դեմոկրատ Հնչակյան կուսակցության Կենտրոնական վարչությունը իր խոր մտահոգությունն է արձանագրում Հայաստանում ստեղծված ներքաղաքական իրավիճակի կապակցությամբ:

«Եռակողմ համաձայնության ստորագրումից ավելի քան երեք շաբաթ անց, չեն դադարում երկիրը ապակայունացնող և հասարակության մոտ ատելություն, խուճապ ու հուսահատություն սերմանող կոչերն ու հայտարարությունները: Ավելին, ընդդիմադիր ուժերը, լուծումներ առաջարկելու փոխարեն՝ դիտավորյալ ու շեշտված կերպով օգտագործում են նախկին իշխանության ծառայող մամուլն ու խորհրդարանի ամբիոնը՝ երկրում անիշխանության ու քաոսի թյուր երեւույթ ստեղծելու նպատակով:

Ճակատագրական այս պահին, երբ բառացիորեն գծվում են Հայաստանի և Արցախի  սահմանները, երբ ունենք ռազմագերիների և անհետ կորածների անհետաձգելի հարց, գաղթականների հարց և երբ երկրում մոլեգնում է կորոնավիրուսը՝ խլելով օրական տասնյակ կյանքեր, թվում էր, թե Հայաստանի պետական շահը վեր դասելով հատվածական շահերից, համախմբում պիտի տեղի ունենար պետականության շուրջ այդ հրատապ խնդիրները լուծելու հրամայականով, այլ ոչ թե հերթական պատեհ առիթ՝ օրինական իշխանության հեռացման պահանջի:

Հասկանալի է, որ պարտությունը առաջացրել է շատ ծանր բարոյահոգեբանական վիճակ համայն հայության մոտ և ինչպես բոլորը, Հնչակյան կուսակցությունը եւս բազմաթիվ հարցադրումներ ունի ներկա իշխանության՝ պատերազմի ամբողջ ընթացքի մասին, սակայն հաստատապես համոզված ենք, որ հիմա չի այդ պահը: Ավելին, այս կրիտիկական ժամանակահատվածում, երբ բոլորիս ջանքերն ու ուշադրությունը պիտի բացառապես ուղղված լինեն առկա անհետաձգելի հարցերի լուծման, անտեղի և անիմաստ ենք համարում ստեղծված իրավիճակի համար մեղավորներ, անմեղներ ու դավաճաններ փնտրելու հանրային բանավեճը, որ անշուշտ պետք է կայանա, սակայն միայն այն ժամանակ, երբ անկախ ու անաչառ հետաքննության արդյունքում հանրությունը իրազեկ կդառնա փաստերին ու ամբողջական պատկերին:

Մյուս կողմից, անառարկելի փաստ է, որ ստորագրված համաձայնությունը բեկանման կամ բարեփոխման ենթակա չի և գործընթացը առաջ է շարժվում սրընթաց, անկախ մեր ցանկությունից կամ ոմանց կողմից հանրության մատուցվող սին խոստումներից: Հետեւաբար, մեզ ուրիշ ելք չի մնում քան գտնել մեր մեջ ուժ և խոհեմություն, այս ծանր ձախողությունից նոր հնարավորություն կերտելու, որ անհնար է առանց միաբանության: Ուստի, կոչ ենք անում բոլոր քաղաքական ուժերին, անկախ ներկա իշխանության նկատմամբ ունեցած վերաբերմունքից կամ տարակարծություններից՝ համագործակցության ձեռք մեկնել նրան, իսկ իշխանությանը հորդորում ենք՝ համախոհության մթնոլորտ ստեղծելուն միտված գործնական քայլեր ձեռնարկել, որպեսզի միասնական ջանքերով հաղթահարենք այս դժվարագույն հանգրվանը»,- ասված է հայտարարության մեջ:





https://zen.yandex.ru/id/5dee07a31e8e3f00ae3051c1


youtube

Բոլոր նորությունները    


Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ