ԵՐԵՎԱՆ, 26 ՕԳՈՍՏՈՍԻ, ԱՐՄԵՆՊՐԵՍ: Արցախի Հանրապետության նախագահ Արայիկ Հարությունյանն առաջարկել է Լեռնային Ղարաբաղի Հանրապետության Գերագույն խորհրդի առաջին նախագահ Արթուր Մկրտչյանին հետմահու շնորհել Արցախի հերոսի բարձրագույն կոչում:
«Արմենպրես»-ի փոխանցմամբ՝ այս մասին Հարությունյանը գրել է «Ֆեյսբուքի» իր պաշտոնական էջում:
«Հարգելի՛ հայրենակիցներ, Արցախի Հանրապետության նախագահին առընթեր պետական պարգևների և պատվավոր կոչումների շնորհման հարցերի քննարկման խորհրդակցական հանձնաժողովի քննարկմանն եմ ներկայացրել ԼՂՀ Գերագույն խորհրդի առաջին նախագահ Արթուր Մկրտչյանին Արցախի Հանրապետության բարձրագույն պետական կոչում (Արցախի հերոս) շնորհելու հարցը»,- գրել է նախագահը:
Հարությունյանը նշել է, որ Արթուր Մկրտչյանի՝ Հայրենիքին մատուցած բացառիկ ծառայության և թողած ավանդի մասին առիթ է ունեցել խոսելու ապրիլի 14-ին՝ քվեարկության գնալուց առաջ:
«Կարծում եմ՝ մեր երիտասարդ պետականության կերտման գործում նրա կատարած աշխատանքն արժանի է ամենաբարձր գնահատականի և սերունդների համար դաստիարակության լավ օրինակ կարող է ծառայել»,- նշել է Հարությունյանը:
Արթուր Մկրչտյանը ծնվել է1959 թ. փետրվարի 16-ինՀադրութի շրջանի Ուխտաձոր գյուղում: 1976-1981թթ. սովորել է Երևանի պետական համալսարանի պատմության ֆակուլտետում: 1982թ.ընդունվել է Մոսկվայի Միկլուխո-Մակլայի անվան հնագիտության և ազգագրության ինստիտուտի ասպիրանտուրան: 1981-1983թթ.աշխատել է Հայաստանի ազգագրության պետական թանգարանում: 1986թ.՝Երևանի հնագիտության և ազգագրության ինստիտուտի աշխատակից, այնուհետև՝ Հադրութի հայրենագիտական թանգարանի տնօրեն աշխատած ժամանակ՝ 1988թ.պաշտպանել է գիտական թեզ և ստացել պատմական գիտությունների թեկնածուի կոչում: 1991թ. դեկտեմբերի 28-ինՈւխտաձորի թիվ 37 ընտրատարածքից ընտրվել է ԼՂՀ առաջին գումարման Գերագույն խորհրդի պատգամավոր:
1992թ. հունվարի 8-ինընտրվել է ԼՂՀ Գերագույն խորհրդի նախագահ:
Կյանքից հեռացել է1992թ. ապրիլի 14-ին:
Հետմահու պարգևատրվել է «Գրիգոր Լուսավորիչ» շքանշանով: