ԵՐԵՎԱՆ, 21 ՄԱՅԻՍԻ, ԱՐՄԵՆՊՐԵՍ։ ՀՀ վարչապետ Նիկոլ Փաշինյանը ժամանել է Արցախի Հանրապետություն, որտեղ կմասնակցի նորընտիր նախագահ Արայիկ Հարությունյանի երդմնակալության հանդիսավոր արարողությանը։ «Արմենպրես»-ի հաղորդմամբ՝ այս մասին «Ֆեյսբուք»-ի իր էջում գրել է Արցախի նորընտիր նախագահ Արայիկ Հարությունյանը։

«Քիչ առաջ Արցախի նախագահ Բակո Սահակյանի հետ միասին Ստեփանակերտի օդանավակայանում դիմավորեցինք ՀՀ վարչապետ Նիկոլ Փաշինյանին և նրա տիկնոջը՝ Աննա Հակոբյանին։ Նրանք կմասնակցեն այսօր Շուշիում կայանալիք ԱԺ հատուկ նորընտիր նախագահի երդմնակալության հանդիսավոր արարողությանը»,- գրել է Հարությունյանը։

Նա նաև տեղեկացրել է, որ մայիսի 22-ին տեղի կունենա ՀՀ վարչապետ Փաշինյանի հետ իրենց առաջին պաշտոնական աշխատանքային հանդիպումը, որի ընթացքում նախատեսված է քննարկել առաջիկա անելիքներին վերաբերող հարցերի լայն շրջանակ։

Արայիկ Հարությունյանը Արցախի Հանրապետության 4-րդ նախագահ է ընտրվել ապրիլի 14-ին Արցախում կայացած նախագահական ընտրությունների երկրորդ փուլի քվեարկության արդյունքներով։

Լիլիթ Դեմուրյան