Պետության աջակցության շրջանակում արդեն իսկ բաշխվել է ավելի քան 2 մլրդ դրամ
ԵՐԵՎԱՆ, 7 ԱՊՐԻԼԻ, ԱՐՄԵՆՊՐԵՍ: Կառավարության ընդունած աջակցության 9 միջոցառումների շրջանակներում՝ ապրիլի 6-ի դրությամբ արդեն 2 միլիարդ 353 միլիոն դրամ է բաշխվել:
«Արմենպրես»-ի փոխանցմամբ՝ այս մասին իր «Ֆեյսբուք»-ի էջում հայտնել է ՀՀ վարչապետ Նիկոլ Փաշինյանը:
«Կառավարության ընդունած 9 միջոցառումների շրջանակներում՝ երեկվա դրությամբ 2 միլիարդ 353 միլիոն դրամ տնտեսական եւ սոցիալական աջակցություն է բաշխվել իրավաբանական եւ ֆիզիկական անձանց»,-գրել է Փաշինյանը:
Կառավարությունը երկրում արտակարգ դրության պայմաններում նախաձեռնել և ընդունել է կորոնավիրուսի տնտեսական հետևանքների չեզոքացման 9 միջոցառումների ծրագիր: Այդ միջոցառումներով աջակցություն է նախատեսվում ինչպես բիզնեսին, այնպես էլ անձանց, որոնք սոցիալական խնդրի առաջ կարող են կանգնել: Կառավարության մշակած 9 աջակցության ծրագրերից 5-ը սոցիալական ուղղվածություն ունեն: Օրինակ դրանցից մեկով աջակցություն կտրամադրվի մինչև 18 տարեկան երեխա ունեցող ընտանիքներին, եթե առկա են մի շարք հանգամանքներ, օրինակ, եթե երեխայի ծնողները չեն ունեցել գրանցված աշխատանք 2020թ. մարտի 12-ի դրությամբ և չեն ընդունվել ժամանակավոր կամ մշտական գրանցված աշխատանքի 2020թ. մարտի 12-ից մինչև 2020թ. մարտի 31-ն ընկած ժամանակահատվածում:
Բաժանորդագրվեք մեր ալիքին Telegram-ում