Պետական նախարարը քվեարկել է հանուն զարգացող ու ժողովրդավարական Արցախի
ՍՏԵՓԱՆԱԿԵՐՏ, 31 ՄԱՐՏԻ, ԱՐՄԵՆՊՐԵՍ-ԱՐՑԱԽՊՐԵՍ։ Համապետական ընտրությունները կարևորագույն քաղաքական իրադարձություններ են Արցախի ժողովրդի կյանքում և ևս մեկ քայլ երկրի ժողովրդավարական ու զարգացած ապագայի համար: «Արմենպրես»-ի փոխանցմամբ` այս մասին ասել է ԱՀ պետական նախարար Գրիգորի Մարտիրոսյանը: Նրա խոսքով՝ այսօր յուրաքանչյուրը գիտակցում և զգում է պատասխանատվությունը պետականաշինության կարևորագույն փուլում:
«Այսօր քվեարկել եմ հանուն զարգացող և ժողովրդավարական Արցախի, հանուն մեր ապագայի: Այս ընտրությունները կարևոր քայլ են կառուցելու զարգացող և ժողովրդավարական երկիր: Կարծում եմ՝ համապետական ընտրություններին մասնակից թեկնածուական բավականին մեծ կազմը խոսում է իրական ընտրության և այն մասին, որ հանրության մեջ կան տարբեր քաղաքական տեսակետներ և կարծիքներ»,- նշել է Մարտիրոսյանը:
Արցախում մարտի 31–ին մեկնարկել են նախագահական և խորհրդարանական համապետական ընտրությունները։
Ժամը 08:00-ի դրությամբ բացվել են կազմավորված 282 ընտրական տեղամասերը, որոնցից 1-ը գտնվում է Երևանում` Հայաստանի Հանրապետությունում Արցախի Հանրապետության մշտական ներկայացուցչության շենքում, մեկ տեղամաս էլ բացվել է Շուշիի քրեակատարողական հիմնարկում։
Արցախում նախագահի պաշտոնը զբաղեցնելու համար պայքարում է 14 թեկնածու։ Նրանք են` Քրիստին Բալայանը, Վիտալի Բալասանյանը, Սերգեյ Ամիրյանը, Դավիթ Բաբայանը, Բելա Լալայանը, Արայիկ Հարությունյանը, Հայկ Խանումյանը, Դավիթ Իշխանյանը, Վահան Բադասյանը, Մասիս Մայիլյանը, Աշոտ Ղուլյանը, Ռուսլան Իսրայելյանը, Աշոտ Դադայանը և Մելսիկ Պողոսյանը։
Ազգային ժողովում տեղ զբաղեցնելու համար ընտրություններին մասնակցում է 12 քաղաքական ուժ.
- «Ազգային վերածնունդ» կուսակցություն
- «Միասնական հայրենիք» կուսակցություն
- «Անկախության սերունդ» կուսակցություն
- «Հայ hեղափոխական դաշնակցություն» կուսակցություն
- Արցախի հեղափոխական կուսակցություն
- «Ազատ Հայրենիք-ՔՄԴ» կուսակցությունների դաշինք
- Արցախի «Արդարություն» կուսակցություն
- Արցախի ժողովրդավարական կուսակցություն
- «Միացյալ Հայաստան» կուսակցություն
- Արցախի պահպանողական կուսակցություն
- Լեռնային Ղարաբաղի կոմունիստական կուսակցություն
- «ՆՈՐ ԱՐՑԱԽ» կուսակցությունների դաշինք
Գործում է 8 ընտրական հանձնաժողով՝ Ստեփանակերտ քաղաքում և Արցախի 7 շրջաններում: Արցախի Հանրապետության ոստիկանության կողմից տրամադրված տվյալների համաձայն՝ Արցախի Հանրապետության ընտրողների թիվը կազմում է 103 հազար 663։
Արցախի Հանրապետության նախագահի և Ազգային ժողովի համապետական ընտրություններում դիտորդական առաքելություն իրականացնելու և ընտրությունների ընթացքը լուսաբանելու համար Կենտրոնական ընտրական հանձնաժողովում հավատարմագրվել է 963 դիտորդ և ԶԼՄ 231 ներկայացուցիչ։
Բաժանորդագրվեք մեր ալիքին Telegram-ում