390.33
Հայաստանը Ռուսաստանից 26 անուն փրկարարական տեխնիկա կստանա
1 րոպեի ընթերցում
ԵՐԵՎԱՆ, 29 ՀՈՒՆՎԱՐԻ, ԱՐՄԵՆՊՐԵՍ: Հայաստանի Շիրակի, Լոռու և Սյունիքի մարզերում փրկարարական տեխնիկական հագեցվածությունը բավականին բարձր է: Ինչպես տեղեկացնում է «Արմենպրես»-ը, այս մասին լրագրողների հետ զրույցում ասաց ՀՀ ԱԻ նախարար Ֆելիքս Ցոլակյանը:
ԱԻ նախարարը նշեց, որ Ճապոնիայի կառավարության կողմից Հայաստանին 22 հրշեջ փրկարարական մեքենաների հանձնումը բավականին բարձրացրեց մարզերի տեխնիկական հագեցվածությունը, բայց դա չի նշանակում, որ մարզերը տեխնիկապես լիարժեք հագեցած են:
«Սպասում ենք 26անուն ռուսական տեխնիկայի: Եթե դա էլ բերվի, վիճակներս բավականին կփոխվի»,- ընդգծեց Ցոլակյանը:
ԱԻ նախարարի խոսքով` հաջորդ ծրագրերը մյուս մարզերի հետ կապված կլինեն:
Ըստ Ցոլակյանի` փրկարարական ծառայությունը ներկայումս երկար՝ 50-մետրանոց ավտոսանդուղքների կարիք ունի:
«Մեզ պետք է 50-ից ավել մետրանոց ավտոսանդուղքներ, որովհետև բարձրահարկ շենքեր ունենք... Կառավարությունում նախապատրաստում ենք մրցույթ և դրա արդյունքներով ձեռք կբերենք երկար ավտոսանդուղքներ: Բացի դրանից, պետք են տեխնիկական միջոցներ մարդկանց տարհանման համար: Ներկայումս տարհանման միջոցներ չունենք, զուտ մնում է փրկարարների մասնագիտական բարձր որակներին ապավինել»,- եզրափակեց Ցոլակյանը:
Բաժանորդագրվեք մեր ալիքին Telegram-ում