Փաշինյանը Վարդենիսում մասնակցեց Հայոց բանակի տոնին նվիրված միջոցառումներին
ՎԱՐԴԵՆԻՍ, 28 ՀՈՒՆՎԱՐԻ, ԱՐՄԵՆՊՐԵՍ: Հայաստանի Հանրապետության վարչապետ Նիկոլ Փաշինյանը Գեղարքունիքի մարզի Վարդենիս քաղաքում հարգանքի տուրք մատուցեց Երկրորդ համաշխարհային եւ Արցախյան պատերազմների ընթացքում զոհված հայորդիների հիշատակին։ «Արմենպրես»-ի փոխանցմամբ` հայկական զինված ուժերի կազմավորման 28-ամյակին նվիրված միջոցառման ընթացքում վարչապետը շնորհավորեց ներկաներին:
«Բոլորիս շնորհավորում եմ հայոց հաղթանակած, փառապանծ բանակի 28-րդ տարեդարձի առիթով: Համոզված եմ, որ մեր բանակի, մեր պետության նկատմամբ բոլորիս ունեցած հպարտությունն ամեն օրվա, շաբաթվա հետ աճելու է մեր բոլորի աշխատանքով, ապագայի նկատմամբ, մեր ինքնության նկատմամբ հավատարմությամբ»,- ասաց Փաշինյանը:
ՀՀ վարչապետին ուղեկցում էին Պաշտպանության նախարար Դավիթ Տոնոյանը, Ազգային անվտանգության ծառայության տնօրենի ժամանակավոր պաշտոնակատար Էդուարդ Մարտիրոսյանը, Գեղարքունիքի մարզպետ Գնել Սանոսյանը, ԱԺ պատգամավորներ, կառավարության անդամներ:
Հայաստանի Հանրապետությունը և աշխարհասփյուռ հայությունը հունվարի 28-ին նշում է ՀՀ զինված ուժերի կազմավորման 28-րդ տարեդարձը:
Բաժանորդագրվեք մեր ալիքին Telegram-ում