ԵՐԵՎԱՆ, 29 ՄԱՅԻՍԻ, ԱՐՄԵՆՊՐԵՍ: Երևանի քաղաքապետ Տարոն Մարգարյանն հնարավոր է համարում 2016 թվականին «Հին Երեւանի» կառուցապատման ներդրումային ծրագրի մեկնարկը։ «Խոշոր ծրագիր է, 150 մլն դրամի ներդրում է պահանջում, եւ այսօր կան այդ ներդրողները, արդեն քաղաքաշինական փաստաթղթերն ենք ձեւակերպում»,- լրագրողների հետ զրույցում հայտնեց Տարոն Մարգարյանը՝ վստահեցնելով, որ պատմամշակութային արժեք ներկայացնող  տարածքները չեն քանդվելու։

«Հին Երեւանի» կառուցապատման ներդրումային ծրագիրն ստորագրվել է 2014  թվականին,  շինարարարական աշխատանքերը պետք է սկսվեին 2015 թվականին

«Արմենպրես»-ի հաղորդմամբ՝ Տարոն Մարգարյանն անդրադարձավ նաև մայրաքաղաքի առջև ծառացած բազմաթիվ խնդիրներին։ «Երեւանի քաղաքային տնտեսությունում առաջնային եւ երկրորդական խնդիրներ չկան, բոլորն էլ առաջնային են, բայց այսօր բոլորս տեղյակ ենք, որ մենք ունենք տրանսպորտի, կանաչ տարածքների ավելացման, քաղաքաշինական, ճարտարապետական, բազմաբնակարան շենքերի ֆոնդի պահպանման խնդիր, սակայն փորձում ենք այդ խնդիրները լուծել»,- ասաց քաղաքապետը։